Espertos revisen dende l’arqueoloxía la historia del orixe del Reinu d’Asturies

|
Genaro Alonso na presentación del congresu polos 1.300 años del orixe del Reinu d'Asturies

El Muséu Arqueolóxicu acueye dende esti miércoles y hasta’l vienres un congresu internacional polos 1.300 años del nacimientu del Reinu d’Asturies. Especialistes de delles universidaes van estudiar, dende l’arqueoloxía, esta época escasa de fontes documentales.

L’Asociación de Profesionales Independientes de la Arqueología de Asturias (APIAA), organizadora xunto col Gobiernu del eventu con motivu del triple centenariu de Cuadonga, centra esta reunión científica nes tresformaciones fondes que tuvieron llugar na Península Ibérica ente últimos años del sieglu VII y el sieglu IX, y que supunxeron el colapsu definitivo de l’Antigüedad Tardía y la llegada de la Edá Media. Asina, la xornada tien como puntu de partida’l reconocimientu de la rebelión encabezada por Pelayo contra’l dominio omeya nel año 718, fecha convencionalmente considerada l’acta de nacencia del Reinu d’Asturies.

El congresu va consistir en 26 intervenciones d’especialistes de les universidaes d’Uviéu, Salamanca, Jaén, Coimbra, Deusto y Vigo, como Iñaki Martín Viso, Juan Carlos Castillo, Paulo Almeida o Jordi Roig i Buxó, ente otros. L’historiador del  Arqueolóxicu César García de Castro va ufrir la conferencia de clausura, que lleva’l nome de ‘La batalla de Covadonga. Problema historiográfico, trasfondo histórico y consecuencias sociopolíticas’.

Conocimientu del nuesu pasáu

Genaro Alonso, conseyeru d’Educación y Cultura, tuvo presente esta mañana na inauguración del congresu que se celebra por una efémeride “suficientemente importante pa siguir indagando y estudiando, reuniendo a espertos arqueólogos y historiadores, p’aportar más datos y meyor conocimientu de lo que foi la nuesa historia inmediata y nesi momentu tan importante como son los anicios del Reinu d’Asturies”. D’igual forma apuntó que les actes d’esti eventu van difundise pa que “lleguen a tolos públicos, asturianos y non asturianos” p’ayudar a difundir un “periodu nel que les fontes documentales son escases; y por eso que sía l’arqueoloxía la que pueda aportar más hasta esi meyor conocimientu”.

Contador Estadistiques