'Esperpentu', 'paconismu' y 'cachopu': asina foi la lloca visita pa conocer a los indíxenes de Xixón

Les redes sociales españaron d'indignación colos detalles del viaxe de 34 creadores de conteníos convidaos por Xixón Turismu pa conocer la ciudá y difundila posteriormente ente los siguidores de les sos cuentes.

Nun tardaron n'apaecer los mensaxes d'indignacion. "Qué noxu, qué vergoña ayeno. Asturies, como si fuera un parque temáticu", apuntaba Claudia Elena Menéndez; "el turismo que nadie quiere en Asturias es esto. Vendernos como un decorado en el que la gente se convierte en figurantes para entretener a los turistas", dicía Santi Villa; "Esto ye lo que queremos vender a los 'influencers' y al mundo lo que ye Asturies", comentaba Marco Antonio Cuiña; o 'Esto ye lo que mos espera col turismu. Actores d'Asturdisney pa entretener a los foriatos', espresaba l'autor Xandru Martino.

Qué noxu. Qué vergoña ayeno. Asturies, como si fuera un parque temáticu. https://t.co/fGxr3IVTEO

— Claudia Elena Menéndez #oficialidá (@claudiaele_rsg) March 7, 2024

Son dalgunes de les 219 reaiciones (ensin contar los comentarios) que tuvo namás nes primeres hores na rede un videu de la cuenta 'Visita Gijón - Profesional', la práutica totalidá nesi mesmu sentíu, asoleyáu por cuenta de la visita de 34 creadores de conteníos del ámbitu de los viaxes que Xixon Turismu convidó pa que conocieran la ciudá y llueu difundieran les sos vivencies ente los sos siguidores p'atrayer esi turismu que tanto empieza a crear rocea ente la población pola so masificación.

Dos actrices representaron una imaxe Xixón y Asturies basaes nos tópicos de denigración de lo rural

Nella víase a dos actrices contrataes pa dar una imaxe costumista de Xixón, falando medio n'asturianu y repitiendo tópicos, nel tren camín a Asturies p'amenizar el viaxe y mientres los convidaos-yos facíen semeyes; unes imáxenes que llevantaron indignación ente los usuarios de la rede X, que les calificaron con términos como 'cutre', 'esperpéntiques', 'pacones' o de 'vergoña ayena'.

La estancia en Xixón depués de conocer a los primeros supuestos indíxenes nel tren d'alta velocidá ferroviaria que coneuta la villa con Madrid tuvo como ún de los puntos fuertes la 'tipica' ellaboración d'un cachopu, que los creadores de conteníos cocinaron coles sos propies manes en compañía d'un cocineru de la ciudá, n'otru episodiu más del intentu de rellacionar a Asturies con esti platu.

Nun podía faltar el cachopu como símbolu de l'Asturies fartona

Otres actividaes más normales como unes visites a la Llaboral o a Trabanco pa conocer la sidra, degustaciones en pasteleríes o una xubida a Cimavilla completaron una estancia de 24 hores. Na nueche d'ayeri, colaron depués de qu'un flashmob del 'Dancin' Queen' d'Abba los despidiere na estación provisional de Xixón.

El turismo que nadie quiere en Asturias es esto. Vendernos como un decorado en el que la gente se convierte en figurantes para entretener a los turistas.
Decidme donde está el beneficio de este modelo para Asturias.
Un decorado con letras en cada pueblo para Instagram. https://t.co/A2Fp66uYlT

— Santi Villa (@soyunsanti) March 8, 2024

Na imaxe, los turistes faciendo semeyes a actores mazcaraos como xente llocal. Semeya propiedá de Renfe.