España entama la guerra'l Perexil

A primer hora d'esta mañana, soldaos españoles tomaron la Islla'l Perexil, una masa rocosa enfrente la costa de Ceuta qu'España lleva sieglos intentando enxertar ente les sos posesiones africanes y na que dende'l vienres de la otra selmana taben un garapiellu de soldaos marroquinos. (ver noticia embaxo). Agora la islla va quedar al cargu d'un destacamentu de la Lexón Española y les rellaciones diplomátiques ente dambos estaos tan cortaes dafechu. Naide nun contaba con una rempuesta militar a l'acción marroquina na peña, pero ayeri'l Congresu de los Diputaos aprebó una resolución apoyando al Gobiernu pa "restaurar la legalidá internacional" nel "affaire perexil". Tolos grupos parllamentarios, sacantes Eusko Alkartasuna y Esquerra Republicana de Catalunya votaron al favor d'esa resolución, que vien a validar l'interés español sobre la islla. El portavoz d'ERC, nel marcu del Debate sobre l'Estáu de la Nación fexo unes declaraciones bien dures esplicando porqué nun apoyaben la resolución pro-gubernamental.Tou esti espolín vien a facese cuando entovía nun s'esclarió de quién ye'l peñón, y siguen apaeciendo voces bien preparaes na mesma España que dicen que'l Reinu d'España nun tien autoridá nin derechu nengún sobre la Islla'l Perexil. L'artículu de la historiadora María Rosa Montero na edición de Güei n'El País asoleya un bon fatáu de documentación que demuestra qu'España nun tien autoridá nenguna sobre la Islla'l Perexil.