España y Francia tramiten una auditoría de l'autopista del mar

|

Andecha Astur fixo'l martes pública la respuesta del Gobiernu estatal a les entrugues plantegaes poles irregularidaes detectaes na autopista del mar. España y Francia tramiten una auditoría.

Jon Iñarritu, diputáu d'Amaiur, organización que forma parte de la coalición Los Pueblos Deciden al traviés d'EH Bildu, presentó'l 14 d'ochobre trés entrugues al Gobiernu estatal pola situación de l'autopista del mar ente Xixón y Naunnt - Saint-Nazère, ensin serviciu dende setiembre. La formación vasca recibió recién les respuestes a les duldes d'Andecha Astur, na que señalen que detectaron problemes na xestión del serviciu, tantu del llau de la política tarifaria, como de los costos que la naviera dio a conocer, y qu'España y Francia tramiten una auditoría a la llinia "a fin d'averiguar con detalle les razones poles que la sociedá esplotadora desvióse nel so oxetivu inicial  facer vidable'l serviciu, una vegada escosaes les ayudes públique pal so llanzamientu". Darréu, apunta qu'estos trabayos van facese "en coordinación colos servicios de la Comisión Europea al cargu del Proyeutu Marco Polo asociaos a esta autopista del mar". Por último, tresllada que pa favorecer un marcu favoratible pa la continuación de la llinia, la Comisión Europea respondió de forma afirmativa a la propuesta de dambos estaos d'allargar el periodu de elixibilidá de los costos pa facer posible el pagu de la totalidá de la subvención.

Andecha ve con satisfaición la confirmación parcial de "les denuncies que veníemos realizando tocantes a les irregularidaes na xestión de l’autopista del mar, poniendo n’evidencia les declaraciones de los responsables del Gobiernu del 'Principado' que nun supieren dir acullá de les declaraciones valeres pa salir del pasu ensin acompangales d’actuaciones concretes".

Contador Estadistiques