Esnalar, lo nuevo de Llangres

El grupu Llangres yá tien preparáu'l so nuevu discu "Esnalar" que va salir a la cai nos proximos díes. Yago Prado comentó n'esclusiva p'Asturies.com los detalles d'esti segundu discu de la banda.

"Esnalar" que ye como va entitulase esti segundu trabayu de la banda, va presentase oficialmente'l próximu 27 de mayu na Sociedá xeneral d'Autores, anque enantes d'esa fecha'l discu va tar yá distribuyíu nes tiendes de discos. Incluso'l día enantes de la presentación el grupu va tocar los temes d'esti CD nuevu nel chigre "Ca Beleño" d'Uviéu, entamando una minixira de presentación que va llevalos el 3 de xunu al Teatru Maripeña de La Felguera y el 11 de xunu a la FNAC del Centru Comercial "Parque Principado" en Siero.


Polo que-y toca a la parte musical , y a falta de poder sentir los temes del discu pa facer el comentariu obligatoriu "Esnalar" va presentar 12 temes, cinco d'ellos cantaos y el restu instrumentales. Estilísticamente, el grupu diz que pretende con esti trabayu "da-y un enfoque más modernu al tratamientu de la música folk, siempre calteniendo l'espíritu fundacional de la banda de trabayar con temes de composición propio", anque dan anuncia de que va haber dalguna sorpresa guardada qu'entovía nun quieren asoleyar
.

El mesmu día en que va presentase'l discu, Llangres va estrenar una versión remocicada dafechu de la so web que va enxertar delles novedaes, ente elles un separtáu de tienda on-line onde van poder mercase discos y productos rellacionaos col grupu que, d'otra manera, yá tien confirmada la so tradicional xira per Italia pal mes de xunu, lo mesmo qu'un bon carráu de conciertos dientro y fuera d'Asturies a lo llargo del branu de los que diremos dando anuncia n'Asturies.com.