Escursión reivindicativa contra l’embalse de Caliao

La organización Ecoloxistes n'Acción tien entamada pal domingu 30 d'ochobre una escursión reivindicativa contra la construcción del embalse de Caliao, en Conceyu de Casu. L'actu ta abiertu a toles persones que quieran dir, y va salir a les 9:30 de la mañana del área recreativa de Los Arrudos, cerca del pueblu de Caliao.

Según les asociaciones ecoloxistes, l'embalse de Caliao ye una de les amenaces más series que pesen sobre'l Parque de Redes. Los conservacionistes califiquen de "mui altu" l'impactu ambiental d'esti embalse, lo mesmo na so fase de construcción que na d'esplotación, pa lo qu'aporten datos sobre les especies afectaes. Animales como'l faisán montés, especie en peligru d'estinción, la llóndriga, l'osu o'l llobu taríen afectaes directamente pola construcción del saltu, lo mesmo que los ecosistemes enteros, y ye que'l proyectu d'embalse cuenta con inundar cinco kilómetros de ríu, qu'incluyen praos, carbayeres, un llugar y dellos elementos de patrimoniu cultural. Los ecoloxistes dulden de la utilidá del embalse, que se plantegó de mano como una instalación pa la "dilución de caudales" utilidá qu'entienden que nun xustifica la construcción de la infraestructura y motivu pol que l'anterior Gobiernu descartó definitivamente la so construcción, esborriándolu dafechu del Plan Hidrolóxicu Nacional col preste de los grupos Socialista y d'Izquierda Unida del Congresu de los Diputaos. El Principáu defende que l'embalse va ameyorar la calidá del suministru d'agua a los conceyos del centru d'Asturies, pero los ecoloxistes camienten qu'ello nun ye preciso y que pue facese con otres soluciones alternatives. Grupos conservacionistes denunciaron yá nel 2004 que l'agua de la cuenca del Nalón taba emplegándose cada vegada más pa la xeneración de corriente y menos pal consumu humanu, una utilización que taba llevando a escosar les reserves del embalse de Tañes, ún de los dos qu'esisten nel calce del Nalón .

El recorríu de la escursión reivindicativa tien una duración d'ente 5 y 6 hores pasando per delles zones que puen tar embarraes, encamentándose l'usu de ropa y calzáu amañosos incluyendo ropa p'agua en casu de que lloviere, anque la organización alvierte que'l recorríu nun presenta mayormente dificultaes, siendo una travesía andariega dente 5 y 6 hores de duración per llugares prestosos de ver y que van presentar, per esti tiempu, los colores propios de la seronda. Pa mas información apúrrese'l teléfonu659 602 531 y el e-mail de la plataforma contra l'embalse.