‘Escueles residuu ceru’ ye’l lema de la XI Rede d’Escueles pol Reciclaxe

|
Santiago Fernández, Francisco Laviana, Ana Isabel Gil, Sara Pérez, Isabel Martínez, Yolanda González y Manuel Gutiérrez

El programa d’educación ambiental de COXERSA, Rede d’Escueles pol Reciclaxe, comenzó'l martes baxo’l lema de ‘Escueles residuu ceru’. Les novedaes principales d'esti cursu, nel que participen más de 200 centros, son un concursu de rellatos curtios, talleres de lliteratura y un contador de residuos pa cada colexu.

Como nos años precedentes, el cursu 2016-2017 abrióse con una xornada de trabayu y intercambiu d'esperiencies pa los docentes –el Seminariu de Profesores–, que tuvo llugar nel Auditoriu Príncipe Felipe d'Uviéu. L'actu institucional incluyó la entrega de delles reconocencies a los centros educativos que destacaron pol so compromisu y polos sos resultaos a lo llargo de la edición anterior, como la Escuela d'Educación Infantil La Toba d'Avilés y el Colexu Públicu El Villar d'Uviéu, que recibieron la distinción Triple Erre “pol so máximu nivel d'aprovechamientu de los recursos disponibles y por llograr implicar a tola comunidá educativa na cultura de la reducción, la reutilización y el reciclaxe de residuos”.

Más de doscientos centros van participar na undécima edición de la Rede d’Escueles pol Reciclaxe, que nesta ocasión busca que nes aules, xunto a la separación de papel/cartón y envases llixeros, o al compostaxe, se trabaye en conceptos como la prevención de residuos (evitar l'espilfarru d'alimentos, apostar pol ecodiseñu, la reutilización…), nel aforru de materies primes y enerxía, o na considerancia de que los residuos son recursos. L’asuntu central de los talleres y actividaes va ser nesta ocasión la lliteratura, cola convocatoria d'un concursu de rellatos curtios entituláu ‘Con R de rellatar’ nel que se va convidar a competir a tolos colexos y institutos, tal como asocedió n'ediciones pasaes colos certames d'anuncios, de flashmob o de curtiumetraxes.

Desque empezó la Rede d'Escueles pol Reciclaxe, nel cursu 2006-2007, el Consorciu pa la Xestión de Residuos Sólidos n'Asturies (COXERSA) facilitó a los centros educativos inscritos un total de 2.734 contenedores de pasiellu pa la recoyida separada d'envases llixeros y de papel/cartón, 11.472 ecopapeleres pal reciclaxe nel interior de les aules, 432 cubos pa les piles y 238 compostadores.

Na semeya, Santiago Fernández, xerente de COXERSA; Francisco Laviana, direutor xeneral d'Innovación Educativa; Ana Isabel Gil y Sara Pérez, representantes de La Toba; Isabel Martínez y Yolanda González, representantes d'El Villar; y el direutor de Calidá Ambiental y vicepresidente de COXERSA, Manuel Gutiérrez.

 

 

Contador Estadistiques