Escritores reclamen la oficialidá na entrega de los Premios Lliterarios

Dos de los premiaos d’esti añu colos Premios Lliterarios en Llingua Asturiana, Vicente García Oliva y Marta Mori, reclamaron na entrega de premios que la llingua se puea emplear en más ámbitos. Oliva fíxolo pidiendo directamente la oficialidá.

Los ganadores de los Premios Lliterarios en Llingua Asturiana 2010, Vicente García Oliva (premiu Máximo Fuertes Acevedo d'ensayu), Marta Mori (premiu Xuan María Acebal de Poesía) y Montserrat Garnacho (premiu María Josefa Canellada de lliteratura infantil y xuvenil) tuvieron presentes esti llunes na entrega institucional que tuvo llugar na Conseyería de Cultura, institución que convoca l’actu.

Na gala d’entrega, García Oliva quiso aprovechar la ocasión pa exixir la oficialidá de la llingua asturiana. Na so intervención, destacó que "los asturianos tenemos una llingua mui guapa, que ye un patrimoniu inmaterial pol qu'hai que lluchar y qu'hai que defender". Al so xuiciu, "la meyor manera de defendela ye pidiendo la oficialidá". Dende'l so puntu de vista, "tarde o temprano llegará esi día".
  
Marta Mori tamién pidió que la llingua puea salir "de la lírica y la lliteratura", y que "podamos empleala n'ámbitos menos prosaicos".
  
Nel zarru del actu, la Directora de Política Llingüística, Consuelo Vega, refirióse a les palabres del escritor. "La llingua asturiana ye un patrimoniu inmaterial, pero tamién pa los que nun la falen, nin la entienden nin s'interesen por ella".

Caltener los premios
Otra reivindicación común de Marta Mori y Vicente García Oliva nes sos intervenciones foi la de pedir qu’estos galardones se caltengan pa próximos años, nuna referencia velada al contestu de crisis económica actual. Dase la circunstancia de que dos de les estayes d'esta edición 2010 quedaron desiertes, la de cómic y la de novela.
        
Los trés recibieron la figura que s'entrega a los ganadores, asina como la cantidá de 7.000 euros. Amás publicaránse les sos obres.
  
Obres premiaes
Vicente García Oliva ye l'autor de 'El Síndrome de Xerezade', qu'analiza la necesidá atropolóxica de contar histories, y la función de los mitos y los cuentos na evolución de la humanidá.

Marta Mori presentó'l poemariu 'La mio voz', del que xuráu destacó'l so carácter "intimista y emocionante, mui bien trabayáu estilística y formalmente".

A lo último, Monserrat Garnacho foi ganadora con 'A pespunte', "un testu que recupera, revisa y actualiza la tradición oral d'una manera que l'avera a los neños y neñes del nuestru tiempu", según la Conseyería.