Escosaes les entraes pal derbi del sábadu

|
El Molinón (Sporting 2-0 Lugo, 27 d'agostu del 2017)

Hebo llargues coles n'El Molinón enantes de l'apertura de la venta de públicu, con xente qu'inclusive fixo nueche nel llugar.

Asturies tien ganes de derbi, anque sía nel infiernu de la Segunda División. Si l'afición del Uviéu respondía con coles la selmana pasada na venta d'entraes pal sector visitante d'El Molinón, esta mañana la del Sporting fixo lo propio. A les 10 hores taba previsto que se punxera en marcha la distribución de los 1.100 tickets pal públicu disponibles, con preferencia na merca p'abonaos, y tiempu enantes yá había una filera llarga de xente nel municipal xixonés, polo que na mesma mañana escosóse tol papel.

Les dos goliaes protagonizaes por dambos conxuntos esta xornada –0-4 col Nàstic los roxiblacos, resultáu que dexa a los de Paco Herrera líder, y 3-0 los azules col Reus– fai que los dos eternos rivales lleguen cola moral alta al duelu del sábadu a les 18 hores n'El Molinón (Movistar Partidazo). Sicasí, enantes dambos conxuntos van tener qu'afrontar la segunda ronda de la Copa: l'Uviéu en casa col Numancia y el Sporting fuera col Reus, dambos a les 20 hores del miércoles, colos arbitraxes del cántabru José Antonio López Toca y del rioxanu Daniel Ocón Arraiz, de manera respeutiva.

 

 

 

Contador Estadistiques