Escláriase la traxedia del Navia

Tres del episodiu de contaminación qu'esti fin de selmana llevó per delantre a cásique tolos pexes en más de cinco kilómetros de ríu, apaez por fín una primer hipótesis sobre les causes de la contaminación.

Luis Laria, director del CEPESMA, yá esplicare de mano que tenía la dulda de si esto pudiere venir d'un vertíu accidental o de si pudiere ser culpa d'una acumulación de contaminantes productu de l'actividá industrial qu'aguanta la ría y que'l calor y la falta de renovación del agua pudieren activar. Cuatro díes depués, esta segunda hipótesis parez que quier confirmase, colo que taríemos énte'l peor de los escenarios posibles al demostrase que'l ríu sufre d'un problema de contaminación grave. Laria esplicó esta mañana a Asturies.com que va garrando forma la idega de que l'episodiu nun se dio por culpa d'una contaminación aisllada, sinon que foi la presencia d'axentes tósicos que veníen posándose yá de vieyo na ría la causante de la muerte de miles de pexes. Como principal axente contaminante, Laria apuntó a vertíos de la sosa cáustico que s'emplega pa la llimpieza de maquinaria industrial y que saldríen de la fábrica que la multinacional Reny Picot tien n'Anlleo. Esta fábrica de derivaos del lleche, que va poco entamó una ampliación, ye una de les tres mayores industries que s'asitien a la oriella del Navia, xunta la papelera d'ENCE y los Astilleros Armón

Mientres el biólogu del CEPESMA facía estes declaraaciones, esta mesma mañana, una delegación d'Izquierda Xunida - Bloque por Asturies fizo una visita al llugar. Encabezada pol Coordinador d'IX Jesús Iglesias y el conceyal Faustino Loy, la delegación pidió que s'espublicen los resultaos de los análisis del agua del ríu

y que se faiga un plantegamientu global
que-y dea una solución definitiva al problema de tola
zona. Los representantes d'IX-BPA llamentaron que'l Plan Hidrolóxicu Nacional ignore al occidente d'Asturies, y pidieron que se llegue a un gran alcuerdu de saneamientu
integral de la Cuenca en que participen los gobiernos estatal y del Principáu y l'Ayuntamientu de Navia, enxertando nesti plan un tratamientu específicu pa esixi-yos a les empreses que viven de la ría que los sos vertíos
nun vayan xenerar dañu mediuambiental.

El conceyal naviegu d'IX
Faustino Loy denunció que "Nin como fuerza politica nin como ciudadanos
nos informaron de les midíes que van adoptase" y pidió que se faiga un plantegamiento de meyora de la
ría "pa que dexe de ser un vertederu".