"Erada" naz pa da-yos pasu a nuevos historiadores y facer llegar a la sociedá la investigación más recién

Presentóse ayeri n'Uviéu el primer númberu de la revista d'Historia Contemporánea "Erada" que de manera monográfica recueye y divulga estudios d'investigación centraos na dómina contemporánea de la nuestra comunidá. Editada por Trabe y coordinada pol historiador Rafael Valdés, "Erada" quier cubrir un vaciu editorial y facer llegar a la población asturiana trabayos que d'otra manera nun saldríen fuera de les paredes de la Universidá d'Uviéu.

Otros de los oxetivos que se pon la publicación ye'l dar pasu a nuevos investigadores y el de potenciar y afalar l'estudiu de la nuestra historia.

Según esplica la editorial Trabe, "contra otres publicaciones de calter herméticu, ERADA nun va desenvolver censures nin ideolóxiques nin llingüístiques, abriendo les sos páxines a tolos investigadores que cumplan unos mínimos de rigorosidá metodolóxica" ello "penriba que faigan parte de la oficialidá académica o non y de la tendencia historiográfica que sigan".

Los conteníos del primer númberu quieren ser una muestra de lo que se pretende cola revista. Artículos sobre'l 25 de Mayu del 1808, el republicanismu decimonónicu o respecto de distintes maneres de resistencia nel ámbitu del trabayu nel Franquismu protegonicen esta primer entrega d'Erada que tamién acuta espaciu pa la recuperación de documentos históricos inéditos y pa la recensión crítica de publicaciones venceyaes a la temática de la revista: la historia contemporánea d'Asturies.