EQUO reclama al Conceyu de Xixón arquiteutura sostenible n'edificios públicos

En referencia a les edificaciones nueves previstes: la xefatura de la Policía Llocal y l'ampliación del Hospital de Cabueñes.

"Amás d'una gran inversión asociada a la so construcción, son edificios con un consumu d'enerxía y mantenimientu que pue suponer un costu eleváu pa les arques públiques", apunten dende EQUO Xixón, que reclama al Conceyu de Xixón "l'aplicación, nos sos edificios y instalaciones, de les recomendaciones impulsaes pola Xunión Europea". Ente los criterios que cita, destaca l'arquiteutura bioclimática, "que tome en consideración les condiciones climatiques y particularidaes del entornu ambiental: orientación, lluz solar, solombramientos, vexetación, topografía, etc.", y l'arquiteutura pasiva, "con sistemes d'envolvente qu'aprovechen les ganancies enerxéticas, construcción pasiva, inercia térmica, cubiertes verdes, etc.".

Tamién demanda l'usu "de sistemes d'autoconsumu o autoproducción por enerxíes renovables", como plaques solares, xeotermia o aerotermia, y una "alta calidá constructiva" que tenga en cuenta certificados con estandares de baxo consumu d'enerxía, "tipo Passivhaus, BBC-Effinergie Neug, Casa Clima u otros aplicaos n'Europa". Otra manera, la formación verde pon en dulda la necesidá d'ampliar Cabueñes, "cuando los estudios muestren un descensu de la población, ta reduciéndose l'atención más cercana y primaría nos centros de salú, y se piesllen cames por la falta de personal, ensin escaecer el posible impautu ambiental na zona y que nestes grandes obres públiques paecen siempre beneficiase les grandes constructuros, amás de los elevaos sobrecostos asociaos a les mesmes".