EQUO Nalón refuga la introducción de bisontes europeos en Caliao

"Nun se pue aceptar que se marafundie un dineral nuna iniciativa que nun tien nengún sentíu ecolóxicu, económicu nin social", apunten dende EQUO Nalón. Los vecinos de Caliao pretenden, con fondos LIFE, vallar una zona del monte Isornu pa introducir estos animales desaniciaos nel país hai miles d'años.

"L'ecosistema actual tien un equilibriu del que desapaeció'l bisonte hai 10.000 años. Introducir agora'l bisonte ye introducir una especie alóctona que perxudicará a la flora y la fauna autóctona", espliquen los ecoloxistes, que tampoco nun ven bien vallar un monte públicu que, amás d'a la fauna del llugar, "pue afectar a la ganadería y al turismu".

La intención de los vecinos de Caliao ye la de facer usu de perres procedentes de los fondos del Programa de Mediu Ambiente y Ación pol Clima (LIFE) pa financiar el 75 por cientu de los 200.000 euros que consideren va suponer la puesta en marcha del proyeutu de centru de cría de bisonte européu nel monte Isornu y el so caltenimientu per cinco años. Ésti tendría diez animales, dos machos y ocho femes, nuna superficie de 200 hectárees.

"¿Cuál ye l'oxetivu verdaderu d'esti proyeutu? ¿Marafundiar los 200.000 euros del proyeutu LIFE? Y llueu, ¿qué facemos colos bisontes?", entrúgase Juan Carlos Lázaro, covoceru d'EQUO Nalón. "Gastar 200.000 euros en traer bisontes ye xenerar un sumidoriu de dineru públicu que nun va tener fin, como'l centro de cría del gallu montés, que ta bien cerca. Gastemos el dineru públicu en coses reales y necesaries y escaezámonos de proyeutos absurdos", demanda.

Fondos europeos pa proyeutos innovadores con "futuru real"

EQUO Nalón propón que dende'l Conceyu de Casu y dende la Mancomunidá s'entamen "alcuentros formativos coles parroquies rurales pa ver la forma d'algamar fondos europeos pa proyeutos innovadores en cuestiones de aprovechamientu d'agües, enerxíes renovables y otros, que permitan xenerar emplegu en coses que tengan futuru real, non imaxinao". Tamién soliciten a los vecinos de Caliao que "reconsidere'l so proyeutu", y al ayuntamientu y al Parque de Redes "que lu refugue".