EQUO modifica nome y imaxe y comprométese col emplegu de la toponimia oficial

Pasa a llamase Verdes EQUO Asturies.

El partíu verde, ecoloxista y ecofeminista EQUO decidió camudar el so nome y imaxe, incorporando'l reconocíu xirasol qu'empleguen los partíos verdes europeos. El logu nuevu emplega 'Asturies', anque'l nome oficial sía 'Asturias', y toles asamblees llocales van usar el topónimu oficial de llugar, esto ye, el tradicional.

Esti cambiu aporta con motivu del décimu aniversariu del partíu, que se celebra en xunu, col oxetivu de rellanzar l'espaciu verde n'Asturies y nel Estáu. “La política útil y al serviciu de les persones y el planeta ye'l métodu esitosu de Los Verdes Europeos énte la crisis social y ecolóxica. Impulsar propuestes concretes pal emplegu de calidá, la salú y el mediu ambiente, ye la meyor forma de lluchar contra la derecha estrema y por el bienestar de güei y les xeneraciones futures", apunten Verdes EQUO Asturies, que plantega impulsar la transición ecolóxica con xusticia social.