Equo entama un llaboratoriu d’idees sobre emplegu y economía verde

L’aula d’actividaes de la uviedina Biblioteca Pública Ramón Pérez de Ayala va acoyer el primer llaboratoriu d’idees sobre emplegu y economía verde qu’entama Equo. Ésti va axuntar a espertos y ciudadanos pa buscar respuestes a la crisis.

Dambos van trabayar nun ámbitu d’igualdá “pa realizar un diagnósticu y aportar propuestes polítiques que dean respuesta a la crisis, apostando polos sectores estratéxicos de la Economía Verde”, señalen dende Equo, formación que plantega un formatu innovador “na forma y nel fondu”. Asina, espliquen qu’esta esperiencia “nun se trata de trayer a grandes espertos que nos enseñen, sinón que, de forma abierta, los propios y les propies trabayadores, empreses, cooperatives, pequeños comerciantes, desemplegaos, coleutivos implicados nel desarrollu de la sostenibilidá  y la propia ciudadanía participen en grau máximu plantegando alternatives y propuestes dende la so visión y esperiencia”. D’igual forma, apunten que nun busca reclamar midíes urxente al Gobiernu pa la xeneración de puestos de trabayu nel país, sinón que se pretende facer propuestes concretes.

La intención d’Equo ye la d’apostar “pola conxunción de la teunoloxía de comunicación d’Internet, les enerxíes renovables y la sostenibilidá económica y ambiental”, reaccionar y tomar la iniciativa de crear “una gran Rede de Sectores Económicos Verdes” y impulsar estos sectores. “Y nun se trata yá de vivir del paisaxe, sinón de tresformar los nuesos recursos humanos y naturales n’actividá económica de forma sostenible y decidida, al tiempu que xeneradora d’emplegu en sectores tales como rehabilitación, edificación sostenible, enerxíes renovables, agricultura y ganadería ecolóxiques, xestión d’espacios naturales, tratamientu y depuración d’agües residuales, xestión y tratamientu de residuos, xestión de zones forestales, servicios ambientales a empreses, I+D+i ambiental y yacimientos nuevos d’emplegu, teunoloxíes de la información y la comunicación, turismu sostenible, cultivos agroenerxéticos, tercer sector, etc.”, enumera’l partíu ecoloxista.

A les 18.30 hores

Pa dar estos pasos, Equo considera fundamental el procesu participativu y, polo tanto, l’entamu d’esti primer llaboratoriu d’idees, que va celebrase mañana, a les 18.30 hores, na Biblioteca Pública Ramón Pérez de Ayala d’Uviéu. “Búsquense víes y alternatives de futuru nueves, afitando les iniciativas de sectores económicos verdes, l’entamu y los proyeutos d’emplegu sostenibles que yá esisten nel nuesu territoriu, protexéndolos con polítiques más comprometíes y valientes, invirtiendo n’intelixencia y ufriendo formación acorde con esti modelu d’actividá nel que podemos especializanos, impidiendo la desllocalización y convirtiendo tamién les iniciatives llocales en motor d’esta economía nueva, más próxima y humana”, señala Pilar Calvo, covocera d’Equo n’Asturies y coordinadora del llaboratoriu d’idees.