Entréguense los Premios Princesa de Asturias

Delles protestes tán convocaes a les 17 hores na plaza la Escandalera, hora y media enantes del comienzu de la ceremonia d'entrega de gallardones nel Campoamor.

L'actriz y direutora d'escena Núria Espert, Premio Princesa de Asturias de les Artes; la historiadora Mary Beard, de Ciencias Sociales; l'escritor Richard Ford, de les Lletres; y Patricia Espinosa, secretaria executiva de la Convención Marcu de Naciones Xuníes sobre'l Cambiu Climáticu, en representación del Premio Princesa de Asturias de Cooperación Internacional, concedíu de manera conxunta col Alcuerdu de París, van ser los gallardonaos encargaos de pronunciar los discursos de la trentésimo sesta edición de la ceremonia que van presidir los reis d'España, cola ausencia de la propia Princesa de Asturias por cuestión d'edá. D'igual forma, tamién van intervenir el presidente de la Fundación, Matías Rodríguez Inciarte, y Felipe VI.

El restu de premiaos son James Nachtwey (Comunicación y Humanidaes), Hugh Herr (Investigación Científica y Téunica), Javier Gómez Noya (Deportes) y Aldeas Infantiles SOS (Concordia). Toos ellos celebraron una audiencia colos reis esta mañana nel salón Covadonga del Hotel Reconquista.

Bloque soberanista na Escandalera

Como vien celebrándose dende hai unos años, la llegada de los gallardonaos y de los reis d'España al Campoamor va tar marcada pola protesta de dellos coleutivos, que convoquen a la población a les 17 hores na plaza la Escandalera p'amosar el so refugu a los premios y a el sofitu de les diferente reivindicaciones. Ente ellos tán l'Asamblea de Trabayadores en Llucha y les Marches de la Dignidá, cola presencia tamién d'un bloque soberanista promovíu pola iniciativa #LluchandoPolaSoberanía.

"Los Premios Princesa y el 'Principado' son una humildación pal nuesu pueblu, una humildación impuesta y financiada con dineru públicu, cola que’l pueblu asturianu tien qu’acabar. Asina lo entendimos siempre dende la izquierda soberanista asturiana, como amuesen les movilizaciones pioneres nel nuesu país escontra los Premios Príncipe entamaes pol Ensame República Asturiana años atrás", apunten.