Entréguense en Xixón los premios del X Concursu Semeyes La Sidra

El ganador foi'l catalán Enric Estarlí.

La xixonesa sidrería La Galana va acoyer l'actu d'entrega del X Concursu Semeyes La Sidra, qu'entama la revista de mesmu nome col sofitu de Sidra JR. Va ser mañana a les 20 hores y nél va recoyer el primer premiu Estarlí, consistente nuna recompensa en metálicu de 700 euros y la medaya d'oru de la Confederación Estatal de Fotografía (CEF), que reconoz esta competición fotográfica. El catalán presentó 'Echando', una imaxe en blancu y prietu na que se ve cómo sal la sidre d'una mano que garra una mazana y cai nun vasu, simulando un escanciáu.

El segundu clasificáu foi Bosco Mercadel con '8 manzanas' y terceru Glendor Díaz Suárez, con 'La vieja caja de sidra', que lleven 200 y 100 euros, de manera respeutiva, amás de la medaya de plata y bronce de la CEF. Mentes, el premiu especial JR, consistente en dos caxes de sidre del llagar xixonés, foi p'Antonio Alcázar con 'Una de sidra por favor'.

Nesta décima edición del Concursu de Semeyes La Sidra participaron 61 fotógrafos, que presentaron 207 trabayos. Amás de les premiaes, el xuráu del gallardón escoyó otres 21 imáxenes que van formar parte d'una esposición itinerante que, en primer llugar, va poder vese en La Galana.