Entrégase'l III Premiu de Perscusión Tradicional 'Manegueru de Nava'

Son dellos los artistes gallardonaos.

La gala d'entrega del III Premiu de Perscusión Tradicional 'Manegueru de Nava', qu'entama la Escuela Municipal de Música de Nava, va celebrase a les 20 hores d'esta tarde na Casa Cultura Marta Portal de la villa naveta. Nél tarán los dos premiaos, Diego Pangua y María González González, merecedora del gallardón xunto cola so hermana Arcides, ésta a títulu póstumu. Tamién van actuar Xosé Antón Fernández 'Ambás', Xeitu Grupu Tradicional, Rodrigo Fernández Joglar, A Mansalva Escuela de Música y Thalía Noriega.

Nel casu de Pangua, el xuráu valora "la so destacada trayectoria profesional como percusionista, sobre manera nel ámbitu del tambor tradicional, rescamplando'l so caláu na docencia y la formación reglada, tamién, n'otres disciplines musicales". Mentes, no que respeuta a les hermanes de Trabáu, empondera'l so "perimportante llabor de caltenimientu y difusión de la música popular durante décades, n'especial de la tradición de la pandereta, como intérpretes y tresmisores del so conocimientu, a les nueves xeneraciones de músicos y bailladores asturianos".

D'igual forma, mientres el fallu del gallardón, el xuráu y la organización del premiu quixo rescamplar "el trabayu y l'esfuerzu de Xosé Antón Fernández 'Ambás', estimando-y fonderamente 'l so compromisu cola cultura'l país". Les persones que conformaron dichu xuráu foron Julio Sánchez-Andrade, profesor de Percusión del Conservatoriu Superior de Música del Principáu d'Asturies; Juan Alfonso Fernández García, direutor del Muséu de la Gaita de Xixón; Fernández Joglar, direutor de la Banda de Gaites LaKadarma; Flavio Rodriguez Benito, direutor de la Escuela Municipal Música de Nava; Alberto Rodriguez Alonso, profesor de Batería de la Escuela Municipal de Música de Nava; y David Varela, profesor de Percusión Tradicional de la Escuela Municipal de Música de Nava, a los que se sumó la conceyala d'Educación y Cultura, Desirée Carrio, como testigu.