Entra Martínez Oblanca; sal Ignacio Prendes

Éstos son los 7 representantes de los asturianos nel Congresu y los 4 nel Senáu.

Isidro Martínez Oblanca torna al Congresu depués de quedar fuera'l pasáu 28 d'abril pol ameyoramientu de resultaos rexistráu na repetición eleutoral pola coalición PP-Foro. La entrada del xixonés nel Cámara Baxa vien acompañada de la salida d'Ignacio Prendes, de Ciudadanos, que fora vicepresidente primeru del Congresu na llexislatura pasada y cuartu hasta la disolución de la Cámara en setiembre.

Nun hai cambios nel restu de diputaes y diputaos por Asturies en Madrid. Asina van siguir Adriana Lastra, María Luisa Carcedo y Roberto García Morís (PSOE), Paloma Gázquez (PP) Sofía Fernández Castañón (Podemos) y José María Figaredo (VOX).

Ente representantes asturianos nel Senáu por escoyeta eleutoral sí qu'esisten cambios pola entrada de Mercedes Fernández en perxuiciu de José Ramón García Cañal, que pasó esti 10-P del númberu 1 al 2 de la llista de la coalición PP-Foro a la Cámara Alta. Los socialistes Francisco Antonio Blanco, María Fernández Álvarez y Fernando Lastra repiten.