Entra en serviciu'l Centru de Día de Castrillón

El Gobiernu d'Asturies punxo'l xueves en serviciu'l centru de día adscritu a la residencia de mayores Palacio de Villar, de Castrillón, que cuenta con quince places nueves. L'equipamientu recibió a los cinco primeros usuarios, dos muyeres y trés homes.

Éstos tienen ente 75 y 93 años y van dir sumando compañeros y compañeres de manera progresiva. L'apertura del centru supón tamién la creación de trés puestos de trabayu d'atención direuta: dos auxiliares d'enfermería a tiempu completu y una terapeuta a tiempu parcial.

La conseyera de Servicios y Derechos Sociales, Pilar Varela, visitó les instalaciones xunto cola xerente del organismu autónomu Establecimientos Residenciales p’Ancianos d'Asturies (ERA), Graciela Blanco, y l'alcaldesa de Castrillón, Yasmina Triguero, acompañaes por familiares de residentes y otres autoridaes. Varela celebró l'apertura d'esti centru, que permite aumentar la ufierta de places públiques d'atención diurna na zona.

Dende agora, l’área III de Servicios Sociales, qu'inclúi los conceyos d'Avilés, Gozón, Corvera, Illas, Castrillón, Cuideiru, Muros, Sotu'l Barcu y Pravia, va pasar a cuntar con 256 places de centru de día: 133 xestionaes pol ERA, 103 dependientes de la Direición Xeneral de Servicios Sociales de Proximidá y 20 del Centru Rural d'Atención Diurna d’IIlas.

Coles mesmes, la conseyera anunció que primero que termine l'añu'l so departamentu va poner en serviciu otres 80 places residenciales na zona d'Avilés: 40 na mesma residencia de mayores de Castrillón y otres 40 nel Centru Polivalente de Recursos d'El Nodo, n'Avilés. Estos servicios van ser posibles gracies el cambiu del catálogu de puestos de trabayu d'Asturies nel que se van crear les places públiques necesaries pa los servicios d'atención directa.

A final d'añu, l’Área III de Servicios Sociales, poro, va contar con 563 places residenciales (416 públiques y 147 concertaes).

Na semeya, Carmen Sellán, direutora del Centro Polivalente de Recursos Palacio de Villar; Blanco; y Varela saludando a un usuariuu del centru de día nuevu.