“Entiendo que-yos moleste a los escritores, pero veo estupendo’l Nobel pa Dylan”, señala Toli Morilla

El xueves conocíase’l fallu del premiu Nobel de Lliteratura, que recayó en Bob Dylan, abriéndose asina un alderique más habitual del Nobel de la Paz que d’otres disciplines. Toli Morilla, la persona que traxo los temes del cantautor al asturianu, ve bien el gallardón pal estauxunidense, anque diz entender a los críticos.

“Paezme estupendo que dean el Nobel a Bob Dylan”, afirma’l músicu nacíu nel 1961, añu nel que l’estauxunidense firmó’l so primer contratu con Columbia pa grabar el so primer discu, espublizáu nel 1962. Sicasí, considera’l premiu como dalgo aneudótico: “nun va ser más importante por tenelu que por non tenelu”.

Entrugáu pola polémica llevantada sobre la entrega del Nobel de Lliteratura a un cantautor, Morilla diz entender “que-yos moleste a los escritores, yá qu’habrá munchos y bonos que lo merezan”, pero fai referencia tamién a les lletres de Leonard Cohen entrugándose si son o nun son poesía. “La canción ye un estilu de poesía y Dylan fixo na so carrera una poética popular”, rellata.

La influencia de Robert Allen Zimmerman, nome orixinal de Dylan, en Morilla foi y ye bien importante. Tanto que nel 2009 espublizó’l discu ‘Diez cantares de Bob Dylan n’asturianu’. Siete años depués el músicu recuérdalu con munchu ciñu y señala que “creo qu’anguaño sigue teniendo vida”. “Trayer los cantares de Dylan al asturianu foi un procesu natural. Lo que llevó más tiempu foi correxir y afinar”, apunta’l cantautor, que sigue “componiendo y tocando, anque sacar un discu, inclusive atopar ónde tocar en direuto, ta difícil anguaño”.