Entámense dos cursos d’asturianu nesti xineru

La Xunta pola Defensa de la Llingua Asturiana (XDLA) y el SNL ‘Comarca de la Sidra’ ponen dos cursos d’asturianu que dan aniciu esti mes. El primeru ye de nivel avanzáu, mentes que’l segundu ta enfocáu a persones que s’averen al idioma.

Xurde Fernández encargaráse d’impartir el de la XDLA, que tien como sede Candás, en concreto’l Centru Polivalente La Baragaña. Ésti ye una continuidá del de nivel básicu que se celebró en seronda en Lluanco y ta destináu a xente que tenga yá conocimientos de llingua asturiana.

Les clases van principiar esti miércoles y el llargor del cursu va ser de 30 hores, que se van repertar ente los miércoles, de 19 a 20.30 hores, y los xueves, de 18 a 19.30 hores. El preciu del cursu ye de 20 euros, cantidá qu’inclúi tol material necesariu. Los contautos p’apuntase o recibir más información son los siguientes: el teléfonu 679.650.998 o’l corréu electrónicu info@exunta.org. El plazu fina mañana.

Hai que recordar que la XDLA ye una entidá acreditada pola Conseyería d’Educación y Cultura pa la formación permanente del profesoráu.

En Villaviciosa

El Servicio de Normalización Llingüística de la ‘Comarca de la Sidra’ entama per cuartu añu consecutivu en Villaviciosa, en collaboración col Atenéu Obreru de Villaviciosa, un Cursín Básicu de Llingua Asturiana. Pablo Suárez Fernández, filólogu, especialista en llingua asturiana y responsable del SNL, encargaráse de poner les clases, que van aniciase’l llunes viniente nos llocales del Atenéu.

Los conteníos que se van impartir son la ‘Historia y socialoxía de la llingua asturiana’, ‘Normes ortográfiques, léxicu, sintaxis y morfoloxía’ y ‘Cultural actual en llingua asturiana’. El cursu va allargase hasta’l 23 de marzu, con clases los llunes y los miércoles de 17.30 a 19 hores.

La xente interesao va poder matriculase hasta’l propiu llunes 18 de xineru llamando al teléfonu del SNL, esto ye, el 985.71.84.13, nel horariu siguiente: de 9 a 15.30 hores, de llunes a xueves. Tamién pue formalizase la inscripción nos correos electrónicos normastur@lacomarcadelasidra.com o ateneovillaviciosa@gmail.es.