Entamen los trámites pa reconocer como patrimoniu inmaterial los horros, paneres y cabazos

El Conseyu de Patrimoniu Históricu que convoca'l Ministeriu de Cultura y Deporte aprobó dar los pasos pa inscribir "los graneros elevaos" na llista xunto cola tuna y l'apicultura.

L'Euskadiko Artxibo Historikoa, en Bilbao, acoyó'l vienres esti axuntamientu nel que participen tolos responsables de Patrimoniu Cultural de les autonomíes, nel casu asturianu Pablo León. Na mesma decidióse presentar la téunica del vidru soplao y la treshumancia como les dos candidaturas internacionales, con participación del Estáu, que van ser evaluaes nel próximu comité de Patrimoniu Cultural Inmaterial de la UNESCO que tendrá llugar en Botsuana del 3 al 9 d'avientu, mentes que la de 'Cultura Sidrera Asturiana' va ser esaminada l'añu qu'entra, al igual que la inclusión de la Comunidad de Madrid, Canarias y Murcia na de ‘L'arte de la piedra en seco' que s'aprobó nel 2018.

Pero tamién diose'l preste al entamu del trámite pa la inscripción de los "graneros elevaos" na Llista de Manifestaciones Representatives del Patrimoniu Cultural Inmaterial pa "contribuyir asina a la salvaguarda d'estes téuniques y tradiciones n'España". "Na propuesta adquieren un notable protagonismu horros, cabazos y paneres d'Asturies pola so bayura, estáu de conservación y pervivencia. En concreto, rescámplense los aspeutos inmateriales venceyaos a la cultura de los horros, ente ellos, los conocimientos, maña, téuniques y práuticas tradicionales y actuales que faen posible la construcción, caltenimientu y reparación d'estes edificaciones per aciu la tresformación de materiales como'l castañu, el carbayu o la piedra, que formen parte del paisaxe y contién la esencia del entornu", apunten dende la Viceconseyería de Cultura, Política Llingüística y Deporte.

Tamién faise referencia so papel "na organización de los pueblos y del so paisaxe cultural, como reflexu d'una forma de vida y d'esplotación del territoriu". Esti reconocimientu llega pol esfuerciu de la recién creada Red Horrea, qu'integra entidaes venceyaes a la proteición del patrimoniu, como l'Asociación del Hórreo Asturiano.

Na semeya, León momentos enantes d'una de les sesiones del Conceyu de Patrimoniu Históricu.