Entamen los III Alcuentros Alternativos y Populares de Bimenes

Sol lema “La represión nun va parar la llucha popular”, Asturies en Pie entama los sos III Alcuentros

Estes xornaes, amás de visibilizar les distintes lluches obreres y sociales que tienen llugar n'Asturies, busquen recaldar fondos pa "sofitar a toles persones multaes, deteníes o encausaes por participar nes lluches que tán teniendo llugar n’Asturies, asina comu pa la solidaridá coles persones represaliaes en cualesquier otra fastera", según la organización.

La organización, a traviés d'un comunicáu denuncia que n'Asturies "atropamos decenes de persones encausaes pola so participación nes numberoses lluches y conflictos llaborales y sociales que tán teniendo llugar demientres los caberos años" y que "les condergues y pidimientos fiscales, que podríen algamar los 300 años de prisión, ponen en cuestión non solamente los derechos básicos que se defenden, sinón el mesmu derechu a la protesta".

Nestes xornaes dende la organización denúncoase la entrada en vigor de la Llei Mordaza y les Reformes del Códigu Penal, que "penalicen entá más les llibertaes públiques, amenaciando seriamente derechos fundamentales como’l de reunión y manifestación, el derechu a la fuelga o’l derechu a la organización y participación nos piquetes informativos".

Por eso, la organización garra como base la Declaración Universal de los Derechos Humanos, cuando diz: “Si los derechos humanos nun son protexíos por un réxime de Derechos, los homes y muyeres tán na obligación de recurrir al supremu recursu de la rebelión contra la tiranía y la opresión”.

Faen parte de ¡Asturies en Pie!: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARAD@S Y PRECARI@S DE ASTURIES, CENTRU SOCIAL SESTAFERIA, ASOCIACIÓN PICU RABICU, CENTRU SOCIAL LA LLUME, ESPACIU LA LLEGRA, DARRÉU, MIERES EN LLUCHA