Entamen les “II Xornadas de Patrimoniu Llingüísticu: Llingua y lliteratura asturllionesas”

 “El Teixu” centra estes segundes xornaes na llingua asturllionesa, especialmente nes variantes falaes en Llión, y failo cola presentación de delles de les últimes novedaes en lliteratura y llingüística asturllionesa, como "Llogas Carbayesas", "Xurdir" y "Onde la palabra pousa".
 

 
Les xornaes van incluyir una conferencia sobre l’asturllionés na Edá Media a cargu de Xulio Viejo, filólogu de la Universida d’Uviéu. D’esta forma, el vienres 6 a les 18:45 horas va comenzar el programa d’actos na Sala Región del Instituto Leonés de Cultura (c/ Santa Nonia, 3) cola inauguración de les xornaes, p’acoyer darréu la presentacion del llibru “Llogas carbayesas”, de Juan Andrés Oria de Rueda, el primer volume publicáu nel asturllionés de Zamora. A les 20:00 hores va ser la vez del manual publicáu pola asociación Faceira “Xurdir. Guía gramatical de leonés”, la primera gramática llionesa, recién salida d’imprenta.
 
Al dia siguiente,sábadu 7, les xornaes van treslladase al Salón d’Actos de la Biblioteca Pública Provincial de Llión (c/ Santa Nonia, 5), cola presentación a les 11:30 de l’antoloxia “Onde la palabra pousa. D’Asturias a Miranda: Crestomatía del asturl.lionés occidental”, na que Xulio Viejo y María Cueto recueyen testos n’asturllionés de tolos xéneros lliterarios, provenientes d’Asturies, Llión, Zamora y Bregancia, y qu’abarquen dende la Edá Media hasta l’actualidá. No que fai al asturllionés de Llión, inclúyense autores como Caitano A. Bardón, Juan Portal, Guzmán Álvarez, Gumersindo García Cabeza, Emilce Núñez, Roberto González Quevedo, Teodora Barrio o Xosepe Vega.
A les 12:30, Xulio Viejo Fernández, coordinador de los únicos estudios reglaos d’asturllionés, el Minor d’Asturianu de la Universidá d’Uviéu, va pronunciar la conferencia “Asturllionés na Edá Media: llingua y actividá lliteraria”. Nesta charla, el profesor universitariu va debuxar la realidá llingüística y lliteraria del asturllionés, llingua mayoritaria nel Medievu ente la población del Reinu de Llión, afondando nos temes que yá estudiara n’obres como “La formación histórica de la llingua asturiana” o “Llingua y cultura lliteraria na Edá Media asturiano-lleonesa”.
Pa zarrar l’actu, contaráse finalmente cola música de Fran Allegre, que vien de sacar el so discu “Nel briezu”, formáu por añaes tradicionales cantaes n’asturllionés.