Entamen esti xueves los alcuentros “les otres cares del Planeta”

Dende va ya ocho años celébrense en Xixón los alcuentros "Les otres cares del planeta" un certame qu'axunta propuestes alternatives que cinquen a los ámbitos más estremaos de l'actualidá política, social, ambiental o cultural. Na edición 2006 d'estos alcuentros, que yá tien preparáu'l so programa, el tema central va ser el del diálogu nes sos manifestaciones más estremaes, dende los ámbitos de les rellaciones personales a situaciones de conflictu social.

Les xornaes van entamar el xueves 20 d'abril con una presentación a les 20:00h nel Antiguu Institutu Xovellanos de Xixón y van espurrise hasta'l sábadu 29, que van echar el piesllu con una folixa popular en barriu de Cimavilla. Nes meses redondes que van centrar el debate va falase de cuestiones como "La sociedá asturiana actual" onde van analizase cola participación de sociólogos y profesores los datos qu'apurren los estudios esistentes sobre valores y vezos de la sociedá contemporánea asturiana, o "migraciones n'Europa" cola participación de periodistes y representantes d'asociaciones que trabayen coles realidaes sociales de la inmigración.

El modelu de ciudá contra'l que vamos n'Asturies, el diálogu ente les orielles del mediterraneu, l'esbarrumble del estáu del bienestar, el diálogu con ETA o la mediación familiar y la custodia compartida nel contestu de la Llei remocicada del divorciu van ser otros de los temes de debate nuna selmana llarga d'actividaes que tamién va acutar güecu p'actuaciones musicales y esposiciones, ente les que llama l'atención l'amuesa "Asturies, patria perdida" na que l'artista Rumaldo Barbero propón diseños alternativos pa la bandera d'Asturies.