Entámase una Folixa pola Paz como respuesta al festival aereu de Xixón

Esti domingu aviones y helicópteros militares van volar pel cielu de Xixón cola celebración del XII Festival Aéreo de Gijón. Coleutivos ciudadanos que s’oponen a esti eventu entamen como respuesta una Folixa pola Paz nel Muséu del Pueblu d’Asturies.

Ye’l tercer añu siguíu nel que’l Conseyu de la Mocedá de Xixón, Acción en Red Asturies y la Coordinadora d’ONGD del Principáu d’Asturies organicen la Folixa pola Paz “como un espaciu abiertu col oxetivu de difundir los principios de Paz y Non Violencia en contraposición a la celebración del Festival Aéreo Militar de Gijón, que  baxo los sos valores probelicistas oculten los valores de violencia, obediencia acrítica y despreciu pola vida humana que constitúin la base de los exércitos”. Asina, les persones que s’averen dende’l meudía al Pueblu d’Asturies van poder participar en múltiples actividaes, dirixíes tanto a un públicu adultu como infantil, “al rodiu la solidaridá, la paz, el mediu ambiente o la interculturalidá”.

Una perfomance a cargu del grupu de teatru Actuación Improvisada pa la llectura del manifiestu de la xornada va abrir la Folixa pola Paz, que va contar con esposiciones sobre los refuxaos, cuentacuentos y taller de bombes de grana (12.30 hores), l’actuación d’Os Penoutas (13 hores), una xinta popular un taller de danza (16 hores) y los conciertos de Buen Suceso (18 hores) y MyVestal (19.30 hores), ente otros. Les actividaes van finar a les 21 hores.