Entámase un Taller de Doblaxe n'Asturianu

|
Taller de Doblaxe n'Asturianu

Va celebrase mientres el mes de setiembre.

La Escuela de Doblaje de Asturias, asitiada en Xixón y con esperiencia amplia nesti campu a partir de Gonzali Producciones, entama un Taller de Doblaxe n'Asturianu pensáu p'aquelles persones "que nun tuvieren contautu nengunu col mundu del doblaxe o namás tuvieren un contautu curtiu col mesmu". Los alumnos van afayase nel doblaxe en llingua asturiana pa garrar conocimientos que-yos permitan "trabayar pa empreses del seutor o pa la televisión autonómica d'Asturies (TPA)".

En concreto, nel taller trátense "elementos téunicos y humanos de la profesión el métodu, la sincronía y el take", con una importancia especial "a la observación de la escena y de los actores, col envís de llograr una bona interpretación acordies cola versión orixinal". Los xéneros colos que se van trabayar van dende'l drama a la comedia, pasando por musicales, mentes que tamién van doblase comerciales y pieces d'animación.

Les clases van tener llugar los díes 16, 17, 18, 23, 24 y 25 de setiembre (llunes, martes y miércoles) de 16.30 a 20.30 hores, con una posa de 30 minutos. El preciu del taller ye de 180 euros y les persones que lu completen van recibir un diploma acreitativu.

Contador Estadistiques