Entama’l Festival de Cómic de Xixón

La 29 edición del Festival del cómic de Xixón entama güei cola presencia ente los autores convidaos d'Ian Boothby, guionista de la famosa serie de TV "Los Simpson".

El certame va desarrollarse d'equí al sábadu 15 cola presencia d'autores nacionales y internacionales que van intervenir en dellos actos en Teatru Xovellanos y Centru de Cultura Antiguu Institutu de Xixón, que van ser los escenarios principales d'un certame que tamién va llevar dellos actos a la Escuela d'Arte d'Uviéu. L'humor, el thriller, los superhéroes, el terror o la ciencia ficción son dellos de los xéneros que van centrar un certame nel qu'amás de Boothby va contase cola presecia del so collaborador nos Simpson Jim Starling y tamién la de Peter David, Igor Korley o David Lloyd

En cuantes a la representación astuiriana, amás de la esposición dedicada al llabor d'Alberto peña sobre la mitoloxía asturiana, los principales llapiceros del país que van tar presentes van ser los de Gaspar Meana, autor de la saga "La Crónica de Leodegundo" sobre la historia del reinu asturianu o Neto, creador de les tires cómiques del selmanariu "Les Noticies" ello amás d'un desconocíu pa la xente de casa como ye Xuasus, un dibuxante asturianu que vive en Gran Bretaña. Esti mierense que tien pintao tebeos del Xuez Dredd tien tamién nel so estoyu artísticu bien de collaboraciones diseñando escenarios y decoraos pal cine en títulos como Harry Potter II, Troya o El Reino de los Cielos .

La gala inaugural celébrase esta tarde a les 19:00 h en Teatru Xovellanos. P'acceder al programa del festival pue consultase la web de El Wendigo, revista organizadora del certame.