Entama’l debate sobre l’estáu de l’autonomía asturiana

El cursu políticu emprima oficialmente col debate d'orientación política de la Xunta Xeneral del Principáu. La ponencia d'apertura a cargu del Presidente asturianu Vicente Álvarez Areces, que ta prevista pa les 11:30 va suponer l'arranque oficial d'un debate nel que, al revés del añu pasáu, el grupu parlamentariu d'Izquierda Xunida- Bloque por Asturies promete que va escenificar un desalcuerdu más marcáu colos sos socios mayoritarios de gobiernu de la FSA-PSOE, anque les voces qu'hasta agora ficieron declaraciones previes dientro de la coalición minoritaria en gobiernu sobre esti asuntu nun quieren falar de posible francedura de l'alianza que gobierna Asturies dende'l branu del 2003.

El salariu social promete ser l'exe de la polémica nel debate. Esta renta qu'ha sustituyir al actual Ingresu Mínimu d'Inserción beneficiando a persones y families na llende de la probitú, foi una de les midíes que se comprometieren nel pautu FSA-IX-BA presentándose nel so día como ún de los pegoyos del llabor de gobiernu. Sicasí, col ecuador de la llexislatura yá pasáu ,el salariu social ta pasando entovía per un abegosu procesu de creación. Mientres IX-BA defende que la cobertura del salariu tenga calter suxetivu, ello ye, que beneficie a tolos que cumplan colos requisitos precisos pa recibilu, dende la parte del PSOE preténdese que'l salariu tenga un tope presupuestariu, una idega cola que concueyen tamién dende'l grupu parlamentariu del PP.

La llingua asturiana, otru de los temes nos que rincha la rellación ente socios de gobiernu, podría apaecer tamién nel debate, anque'l so protagonismu va tar venceyáu lo más seguro al procesu de creación de la TV autonómica, mientres que la financiación de los conceyos, cola Federación Asturiana de Conceyos (FACC) pidiendo un cambeu que dexe de condicionar les aportaciones del gobiernu autonómicu a actuaciones concretes.

De cualquier manera, va ser preciso esperar hastamañana pa ver como se representen los posibles desalcuerdos ente fuerces de gobiernu y la postura del únicu grupu opositor, que van poder falar nel turnu de réplica. Güei namás va haber tiempu pal discursu del presidente, una intervención na que les intervenciones en materia d'infraestructures y l'aportación del gobiernu central a les mesmes, como l'ampliación de El Musel, la regasificadora, la variante de Payares, el desdoblamientu de la carretera Uviéu Xixón AS-18 o la construcción del hospital central van ser seguramente protagonistes.