Entama’l CrossRoad Festival

El festival de rock y blues más importante d'Asturies entama esta tarde coles actuaciones de King Wolf and The Hound Dogs, Willy de Ville y la banda asturiana Robbie and The Wild Trains.

El CrossRoad entama a les 8 y media d'esta tarde nos praos de la Universidá llaboral de Xixón la so edición más ambiciosa. Willy de Ville, veteranu de formaciones como Mink deVille y de gran sonadía n'España pol famosu tema "Demasiado corazón" ye'l ganchu del cartel de güei cola so mecigaya particular de cajoon, blues y rythm and blues. Na nómina d'esta nueche figuren tamién figuren la banda "King Wolf and The Hound Dogs" banda liderada por Andreu Muntaner "Lobo" y na que tan presentes dellos de los meyores músicos de la escena rock española consagraos a la recuperación y caltenimientu de la obra d'Elvis Presley al traviés de les versiones de los sos temes. La so actuación va ser la qu'abra'l festival a eso de les 20:30h pa da-y pasu a Willy de Ville a les 22:30h.

P'acabar la nueche, a eso de les 12:30 ta previsto que salgan al segundu escenariu Robbie and The Wild Trains, mecigayu de músicos asturianos nel que llama l'atención la presencia de Roberto Egocheaga, líder de la banda de rock de los 90 "Los Cohetes" y que va acompañase n'escenariu de grandes músicos como'l guitarrista Rafa Kas (Ilegales, Fe de Ratas…) colos que van tocar tolos palos del rock, dende'l country hasta'l surf.

La entrada pa la sesión de güei cuesta 22 euros pa los que nun tengan abonu pa los cuatro díes. La organización dio parte ayeri de la contratación d'un serviciu d'autobuses cola empresa municipal EMTUSA pa les nueches del vienres y del sábadu. Asina, los autobuses del serviciu de nueche de la empresa que vengan de Viesques van disviase hasta la entrada del festival, onde van recoyer al públicu a les 2:50 hores y a les 4:10hores, amás d'un autobús que va tar a la puerta del recintu a les 3:30 hores y que, como tolos demás, va rematar el trayectu na Plaza l'Umedal de Xixón. L'autobús de llinia normal apara enfrente del festival ente les 6:30 de la tarde y les 12 de la nueche.

Más información na web del CrossRoad Festival. Ver equí un álbum de semeyes de la edición del CrossRoad 2004