Entama una Asturies.com nueva

A lo llargo de los proximos díes, Asturies.com va proceder a un remocique xeneral de tol so diseñu y conteníos col que queremos entamar una etapa nueva dientro d'esti mediu.

Amás d'actualizar la nuestra imaxe, trátase de facer que la navegación pelos conteníos d'Asturies.com sía más amañosa, inxertando meyor nel diseñu xeneral del mediu los servicios y secciones nueves que dende va un tiempu p'acá llevamos desarrollando. Ente ellos cabe citar Asturies.com Radio, que va poco enanchó la so ufierta cola entrada en serviciu d'Asturies.com Radio Canal Independiente y que va siguir faciéndolo con nueves canales temátiques, o el serviciu de descarga de vídeos baxo demanda Asturies.com TV que la nuestra empresa lleva alantre en collaboración cola Universidá d'Uviéu y Telecable. Ello xunta otros servicios complementarios como la tienda asturiana na rede Asturshop o les carteleres de cine y espectáculos. Ente los conteníos que va ufiertar esta Asturies.com nueva va contase tamién con tribunes d'opinión firmaes por especialistes en dellos ámbitos de l'actualidá asturiana o con una hemeroteca onde poder consultar un archivu históricu de noticies, amás d'otres ventayes de tipu funcional como una carga más rápida y amañosa de los conteníos, que van meyorar igualmente'l so aspectu visual.

Con motivu de la puesta en marcha d'esta versión, la cuarta nos yá cerca de nueve años d'esistencia d'Asturies.com, queremos agradecé-yos a los nuestros llectores la so confianza a lo llargo de tou esti tiempu, al empar que queremos pidir disculpes polos problemes técnicos que puean dase a lo largo de les próximes hores por causa de la puesta en marcha progresiva de la versión nueva d'Asturies.com.