Entama na Plaza'l Güevu de Villaviciosa la VIII Feria d’Artesanía

La VIII Feria d’Artesanía de Villaviciosa abre esti miércoles les sos puertes fiel a la cita cola Selmana Santa maliaya. Diecisiete artesanos van ufrir hasta’l domingu los sos trabayos fechos con acebache, madera, cerámica, piedra o cueru.
 
A les 11 hores d’esta mañana principió a recibir xente’l recintu habilitáu na Plaza’l Güevu pa esti certame que cumple la so octava edición y que yá ye una referencia de la Selmana Santa maliaya. La Asociación Coordinadora de Artesanos de la Comarca de la Sidra, en collaboración cola Mancomunidá de la Sidra y el Conceyu de Villaviciosa, organiza esta actividá que va tar abierta al públicu hasta’l domingu de 11 a 14 hores, y de 16 a 21 hores.
 
Los maestros, talleres y comercios que participen nesta edición de la Feria d’Artesanía de Villaviciosa son Cerámica Serbal, María Pérez, Oleum, La Salamandra, Montse Loredo, Charo Cimas, M&M Cuero-Casa Luna, Taller Linu, Taller El Rayu, Acebache Llantones, Nemoralia, Un nido de culebras, Taller Rosa Méndez, Juanrapín, Taller Cuñai, El mago de palo y Plata y color.