Entama la selmana de les lletres

L'Aula de les Metáfores "Fernando Beltrán" de Grau atecha esta tarde los primeros actos oficiales de la XXVI Selmana de les Lletres Asturianes qu'entama la Conseyería de cultura d'Asturies. La dedicatoria d'esta edición de la Selmana de les lletres a la figura de los poetes modernos n'asturianu conózse en viendo'l tema qu'ocupa l'actu d'esta tarde en Grau, que nun ye otru que la presentación del DVD "Diez poemes" un trabayu colectivu qu'incluye curtios cinematográficos fechos polos realizadores Sergio G. Sánchez, José A. Braña, Ramón Lluis Bande, Jorge Rivero y pola pareya de creadores qu'igüen Juan Luis Ruiz y Lucía Herrera sobre poemes de Roberto González-Quevedo, Berta Piñán, Xuan Bello, Pablo Antón Marín Estrada y Ana Vanessa Gutiérrez.

Darréu de la proyección, que va facese a les 7 y media, va celebrase una mesa redonda cola participación de les poetises Taresa Lorences y Ana Vanessa Gutiérrez, el pintor Hugo O’Donnell y el músicu Xabel Vegas. El profesor de lliteratura de la Universidá d'Uviéu y responsable del Aula de les Metáfores Leopoldo Sánchez Torre va moderar el debate. Les emisiones de RTVE y de RNE n'Asturies van reproducir los materiales d'esti DVD quese presenta güei.

Entama asina oficialmente la XXVI Edicíon de la Selmana de les Lletres que va durar bastante más que siete díes, en cuantes que tan programaes actividaes hasta'l 19 de mayu, y qu'incluye recitales de poesía nes principales villes d'Asturies: Xixón, Cangues d'Onís, Llangréu, A Veiga, Grau, Avilés, Cangas del Narcea y Mieres son los llugares onde van celebrase estos recitales, qu'amás van contar con delles particularidaes según en que llugar se faigan. Asina, el recital d'Avilés (día 3 de mayu) va incluyir l'espactáculu "nueche d'insomniu"del cantautor Toli Morilla, mientres que nel casu de Llangréu va facese tamién un pase d'un musical sobre la figura del musicólogu asturianu Eduardo Torner. Otru héroe local, el cantautor Pedru Pereira, va tener tamién protagonismu propiu nel recital a celebrar en Cangas del Narcea.

D'otra manera l'actu central de la Selmana queda acutáu pa la capital, Uviéu, onde'l xueves 5 de mayu, nel Auditoriu "Príncipe Felipe" va celebrase un macrorrecital de poesía nel que va contase cola presencia de dos convidaos de rellume. Per una parte, el premiu Nóbel de lliteratura del añu 1995, l'irlandés Seamus Heaney y per otra'l Premiu Nacional de Poesía d'España Luis García Montero. El poeta irlandés va pronunciar amás el día 4 de mayu nel paraninfu de la Universidá d'Uviéu la conferencia "Poesía y Territoriu" mientres que l'español coordinó pa la Selmana de les lletres la edición d'una antoloxía poética que va entitulase "pallabres clares".
El programa completu de la Selmana de les lletres pue consultase nesta web