Entama la campaña de la renta

Como tolos años, la Facienda Pública pon a andar la so ferramienta recaudadora. Esti añu la campaña de la renta entama güei 3 de mayu y va finar el 1 de xunetu pa toles declaraciones (a ingresar y devolver). Según l'Axencia Tributaria 15.26 millones de contribuyentes van facer la declaración esti añu, lo que ye una medra'l 4% respectu al añu anterior. La estimación ye qu'al 75% de los contribuyentes va sali-yos la declaración a devolver, y les cuentes de la Facienda cuenten con ingresar na operación5.400 millones d'euros mentanto que les devoluciones van algamar sobre los 8.600 millones.

Esta campaña tien delles novedaes. En primer llugar ye la primer vez que'l primer día de campaña entama'l periodu de devoluciones, col oxetivu de facer el 80% de les mesmes enantes del 1 de xunetu. Tamién ye'l primer añu que s'unvien los borradores de la declaración a toos aquellos contribuyentes que lo pidan. Los contribuyentes que puen solicitar el borrador son aquellos con rindimientos del trabayu, de capital mobiliariu suxetos a retención o ingresu a cuenta asina como los orixinaos poles Lletres del Tesoru, les imputaciones de rentes inmobiliaries siempres que s'orixinen en dos inmuebles como máximo o ganancies patrimoniales sometíes a retención o ingresu a cuenta. Si'l contribuyente ta d'alcuerdu col borrador namás tien que firmalu y da-y el preste. Nel día d'entamar la campaña Facienda yá tien 200.000 d'estos borradores firmaos, y cuenta con qu'otros 6 millones de contribuyentes empleguen esti métodu Otra de les novedaes ye la de los mensaxes sms pa confirmar el borrador. Con unviar un avisu al númberu 5025 pue confirmase'l borrador de la declaración, eso sí, con un coste de 60 céntimos el mensaxe. En cuantes a internet, xunta la posibilidá que yá se tenía otros años de facer la confirmación de la declaración pela rede, tamién ye posible esti añu pagar al traviés d'Internet con tarxeta de créditu dende'l sitiu oficial