Entama Asturies.com TV

Con motivu del Día de les lletres, Asturies.com presenta un nuevu serviciu pa los sos llectores: Asturies.com TV, un serviciu de descarga de vídeos baxo demanda nel que'l públicu d'esti mediu pue acceder dende güei mesmo, a una ufierta audiovisual n'asturianu que va dir enanchando progresivamente hasta facer d'esti serviciu un estragal d'accesu a lo más interesante de la producción n'asturianu de productos tan demandaos como videoclips o documentales. Por de pronto, Asturies.com TV estrénase con un pequeñu recopilatoriu del pasáu Conciertu Pola Oficialidá, un documental sobre la figura del escritor Andrés Solar y dos vídeos musicales que recueyen l'últimu clip del grupu llavianetu "Los Berrones" y una actuación del grupu Dixebra.

La esperiencia d'Asturies.com TV ye posible gracies a la collaboración col departamentu d'Inxeniería Telemática de la Universidá d'Uviéu y al encontu técnicu qu'apurre la empresa asturiana de telecomunicaciones Telecable.

Cola entrada en serviciu d'Asturies.com TV esti mediu de comunicación da un pasu más nel remocique y actualización del so portal n'internet y pieslla un círculu completu d'ufierta comunicativa n'asturianu al amestar conteníos audiovisuales a un soporte que yá incluye per una parte les informaciones escrites del diariu Asturies.com, que dende 1997 ye'l primer pegoyu de la prensa electrónica n'asturianu, y per otra los conteníos falaos d'Asturies.com Radio, que yá lleva un añu enteru emitiendo. Gracies a tolos nuestros llectores pol so enfotu y bon día de les lletres asturianes.

Entrar a Asturies.com TV (neto que nel casu d'Asturies.com Radio ye imprescindible disponer del reproductor Real Player)