'Ensin muyeres nun hai idiomes', concursu de creación lliteraria con motivu del 8-M

|
Cartelos 'Ensin muyeres nun hai idiomes'

Iniciativa pol Asturianu entama esti certame pa testos n'asturianu y gallego-asturiano.

'Ensin muyeres nun hai idiomes/Sin muyeres nun hai idiomas' ye'l nome d'esta iniciativa que pretende, con motivu del 8-M, Día Internacional de la Muyer, reivindicar el papel que tien la muyer na sociedá. Asina, convida a la sociedá asturiana a participar nun concursu de creación lliteraria que lleve al autor y al llector "a reflexonar sobre la importante figura de la muyer como pegoyu onde deprendimos la nuesa llingua materna, fixándonos especialmente nesi idioma nel que viven, sienten y nos críen les muyeres que nos arrodien".

Los trabayos han ser inéditos y orixinales, escritos en llingua asturiana o en gallego-asturiao, en prosa o versu, y tienen que tener como máximu 280 caracteres. Éstos han unviase a la direición de corréu electrónicu info@iniciativapolasturianu.org en formatu PDF.

El plazu pa participar nel concursu ábrese esti 8-M y fina'l 21 de marzu al meudía. El 31 van dase a conocer les persones y testos merecedores de los trés primeros premios, que van recibir como recompensa un llote de llibros.

"Iniciativa pol Asturianu anima a la sociedá asturiana a participar nesti concursu como homenaxe a toles muyeres que nos arrodien y a les que gracies a elles deprendimos asturianu", señala la organización.

 

Contador Estadistiques