Enernalón, un apueste poles renovables na cuenca minera

Dende va tres años funciona con sé en Ciañu (Llangréu) l'Axencia Local de la Enerxía (Enernalón), un ente financiáu en parte pola UE y participáu pol conceyu de Llangréu, la conseyería d'industria y delles empreses del sector que trabaya nel campu de les enerxíes renovables y non contaminantes. Tolos años, Enernalón fai memoria de l'actividá desendolcada, na que rescamplaron esti 2.002 les prebes que se ficieron nos autobuses de la Cuenca'l Nalón con combustible de biodiesel (gasolio reciclao que se saca del aceite de freir). Según Enernalón estes prebes consiguieron que s'echaren al aire 50 tonelaes menos de diósidu de carbonu, que sedríen les equivalentes que se produciríen casu d'haber quemao gasoil mineral. El resume d'actividaes da anuncia de qu'otros dos proyectos qu'echarona andar nel 2.002 quitáron-y a l'atmósfera otres 37 tonelaes de gas velenoso. Estos dos proyectos consistieron nuna caldera pa residuos nuna fábrica de muebles que vieno a sustituyir la qu'había de gasoil y na instalación de paneles solares de carbón pa calentar l'agua nel Centru Ocupacional de Pando - La Felguera. Xunta estos esperimentos, que van camín de facese realidaes como la construcción d'una planta pa fabricar biodiesel na cuenca minera, l'Axencia Local de la Enerxía tamién vien faciendo actividaes de formación pa profesionales d'un sector, el de les enerxíes llimpies, que va crecer muncho d'equí en pocos años. Amás d'investigar y dar formación, Enernalón tamién tien un llabor divulgativu col qu'intenta esparder l'usu de les renovables, non yá namás a nivel d'empreses, sinon tamién de particulares, que puen producir la so propia corriente y salir ganando con ello. Pa ello l'axencia edita un boletín trimestral que cuenta con una edición n'asturianu y ofrez una páxina web na que da anuncia de la so actividá