Encarnación Rodríguez presentó la programación del teatru de la Llaboral de Xixón

La conseyera de Cultura y Turismu del Principáu d'Asturies, Encarnación Rodríguez, presentó ayeri la programación del primer trimestre de 'LABoral Escena', el remocicáu teatru de la Universidá llaboral de Xixón, una programación que la responsable de les polítiques culturales del Pricipáu calificó como contemporánea, vanguardista y multidisciplinar. "LABoral escena ye una iniciativa de producción creativa onde tienen cabida dende los proyectos más vanguardistes hasta los más populares", declaró la conseyera.

Na rueda prensa, Encarnación Rodríguez manifestó que 'LABoral Escena' plantégase como un espaciu múltiple, qu'ha servir pal teatru d'Asturies y pal serviciu de los asturianos. Sobre ello, la conseyera declaró qu'ún de los sos oxetivos pa esta llexislatura ye la meyora de los mecanismos de collaboración col teatru asturianu. La presentación de la programación qu'inaugura la temporada de 'LABoral Escena', produzse enantes de la inauguración oficial del Teatru del recintu cultural por parte del ministru de Cultura, César Antonio Molina, el próximu vienres 19 d'ochobre.


El nuevu espaciu va contar con casi 2.000 llocalidaes. El Teatru de la LABoral también va tar a disposición de los grupos de teatru asturianos pa que puean contar con nuevos llugares pa desarrollar el so trabayu. El director de Programación de 'LABoral Escena', Mateo Feijóo, destacó como ún de los oxetivos d'esta programación l'espardimientu n'Asturies de toes aquelles iniciatives artístiques que tienen llugar a nivel internacional. Ente les principales actividaes a desarrollar nel primer trimestre, Feijóo destacó la proyección de 'Shadows', un documental realizáu polos cineaestes Paul y Meno de Nooijer. El pase d'esta película, que contó con intérpretes asturianos, va facese amás a lo llargo de la celebración del Festival Internacional de Cine de Xixón. Otru de los platos fuertes de la programación de 'LABoral Escena' va ser l'espectáculu 'Unidá móvil en disolución', del músicu Llorenç Barber, el próximu 19 d'ochobre, coincidiendo cola inauguración oficial. "Trátase d'una representación con un claru xerme participativu", declaró'l director de programación.

Ente les iniciatives que completen el cartelu cultural de LABoral pa esti primer trimestre destaquen la esposición de semeyes 'Melody Fair', del artista arxentín Ramiro E, la representación teatral 'Scope' de Rui Horta, o'l taller sobre la figura del dramaturgu alemán Heine Müller, dirixíu a persones mayores de 18 años estudiantes y profesores d'arte dramáticu o simplemente a aficionaos al teatru.

El director de Programación de 'LABoral Escena' adelantó dalguna de les propuestes culturales pal próximu añu 2008, ente les que destacó'l Festival Internacional de Música y Pallabres, 'Spoken Word', que va celebrase los díes 4, 5 y 6 d'abril.


Pal viceconseyeru de Cultura, Jorge Fernández León, el remocicáu teatru de LABoral, onde van facese la mayor de les representaciones de 'LABoral Escena', ta concebíu como elementu de complementariedá del restu de los teatros asturianos. "Nun hai de velu poro como competencia hacia'l restu", declaró León.
El viceconseyeru también incidió na necesidá de xenerar polítiques d'innovación como garantíes pa cualquier proyectu cultural que busquen nuevos espectadores.