“En Xixón fixéronse munches coses en normalización llingüística nestos 15 años”, destaca María Xosé Rodríguez

|
Inauguración esposición 15 años Oficina de Normalización Llingüística de Xixón

“Ye un percorríu pelos 15 años de la normalización llingüística en Xixón”, esplicó María Xosé Rodríguez López, responsable del serviciu, sobre la esposición qu’esti miércoles abrió les sos puertes nel Centru de Cultura Antiguu Institutu. Ésta acompáñase d'un videu de 15 minutos de llargor y va poder visitase hasta’l 17 de xineru.

La Oficina de Normalización Llingüística cumple 15 años y el SNL xixonés celébralo col entamu d’una amuesa que repasa’l llabor normalizador fechu pol Conceyu de Xixón dende que n’ochobre del 2003, nun despachu de la Conceyalía d’Educación y Cultura de l’Antigua Pescadería con Carmen Rúa como edil, ellaboróse’l primer presupuestu y el primer programa. Trés meses depués, el 21 de xineru del 2004, presentóse de manera oficial la Oficina Municipal de de la Llingua de Xixón, nome col que nació, na sala de receiciones de la Casa Conceyu.

La Casa Nava foi’l primer llar del serviciu, pa llueu pasar nel 2005 al Centru de Cultura Antiguu Institutu compartiendo espacios con otros departamentos. Dende esti agostu la Oficina de Normalización Llingüística ocupa por fin un llugar dignu y visible a la ciudadanía al asitiase onde taba la Oficina de la Mocedá, na entrada del Antiguu Institutu.

 “Nótase que vien más xente a interesase”, destaca a Asturies.com Rodríguez López, qu’anuncia que va acondicionar la parte d’arriba del llocal pa instalar una biblioteca sobre l’idioma y la normalización llingüística pa consulta de les persones interesaes. Ella conoz de primer mano too esti procesu y del crecimientu del SNL como responsable del mesmu dende l’entamu, unos primeros pasos nos que namái tenía l’apoyu de dos becarios, pa llueu incoporar una alministrativa y, más alantre, una téunica de normalización.

Anguaño la plantiya fórmenla cuatro persones, esto ye, la responsable, l’alministrativa, la téunica y una becaria, cola posibilidá d’ampliala con otra beca. Un equipu qu’a lo llargo del añu pon en marcha iniciatives destinaes tanto pa escolinos como adultos o dellos sectores de la población, siendo’l conceyu “cabezaleru bien de veces n’actividaes, proyeutos y campañes de normalización”, como bien destacó Rodríguez López a los presentes na so intervención na inauguración de la esposición asitiada na sala 3 del Antiguu Institutu, que ta acompañada d’un videu de 15 minutos de llargor nel que participen xixoneses venceyaos a la llingua asturiana como Vicente García Oliva, David Guardado, Iris Díaz Trancho o Inaciu Galán, ente otros.

Conceyu cabezaleru

“En Xixón fixéronse munches coses en normalización llingüística nestos 15 años” apuntó tres la introducción breve fecha pola conceyala d’Educación y Cultura, Ana Montserrat López Moro. Darréu, Rodríguez López esplicó, una a una, les actividaes más destacaes de cada una de les partes nes que se divide la esposición: alministración pública, estaya socieconómica, estaya sociocultural, tresmisión xeneracional, enseñanza, mocedá y deporte, a lo qu’hai que sumar una introducción sobre la Oficina de Normalización Llingüística.

Ente les numberoses persones qu’acudieron a la presentación destacó la presencia de Mario del Fueyo, voceru municipal de Xixón Sí Puede; Ana María Castaño, conceyala d’IX; Raquel Huergo, direutora de la Fundación Municipal de Cultura, Educación y Universidá Popular; Pablo Xuan Manzano, en representación de l’Academia de la Llingua Asturiana; el maestru Nacho Fonseca; Amadéu Benavente, de l’asociación cultural Ástura; Tino Lozano, de la Tertulia Cultural El Garrapiellu; y Xuan Pandiella, d’Iniciativa pol Asturianu. L’amuesa va poder visitase hasta’l 17 de xineru nel horariu siguiente: de 18 a 21.30 hores, de llunes a vienres; de 11 a 14 y de 16 a 21.30 hores, los sábados; y de 11 a 14 hores, los domingos.

Na semeya, Rodríguez López esplica a los presentes los detalles de la esposición.

Contador Estadistiques