EMTUSA continúa utilizando la toponimia non oficial de Xixón

La Empresa Municipal de Tresportes Urbanos de Xixón (EMTUSA) sigue utilizando la toponimia castellana, non oficial nel conceyu, nos sos autobuses. L’alcaldía comprometióse n’ochobre con Iniciativa pol Asturianu a iguar esta situación.

Tres l’aprobación de la toponimia tradicional como la oficial del conceyu, nel añu 2006, los autobuses d’EMTUSA principiaron a utilizar los nomes asturianos de llugar –tamién na información de les paraes–, pero col cambiu del gobiernu municipal, que pasó de tar en manes del PSOE y IX-Bloque por Asturies-LV a les de Foro Asturias Ciudadano, tamién camudó la xerencia de la empresa pública y la so política al respeuto de los topónimos. Asina, inorando la llegalidá, tornaron a utilizase los castellanos, tanto nos autobuses como na web d’EMTUSA: en llugar de Les Mestes apaez Las Mestas y nel d’El Cerilleru, Cerillero, por poner dos exemplos.

L’Asociación Cultural N’Ast denunció esta situación y Iniciativa pol Asturianu metió una reclamación nel rexistru que tuvo respuesta dende l’alcaldía con una carta con fecha del 25 d’ochobre. Nella comunícase a Iniciativa pol Asturianu que “va procedese a revisar les posibles variaciones que puedan detectase”, yá que, según l’alministración xixonesa, “la política de toponimia d’EMTUSA nun sufrió nengún cambiu”. El Conceyu de Xixón agradeció al coleutivu que trabaya pola normalización del idioma la reclamación, “qu’ayuda a ufrir un meyor serviciu a los ciudadanos”. Sicasí, más d’un mes depués, la empresa pública continúa utilizando una toponimia illegal.

Iniciativa pol Asturianu entiende que “l’usu de la toponimia oficial nun ye opcional pa les alministraciones públiques, que tienen la obligación de respetar el decretu topónimicu de Xixón, aprobáu col consensu de toles fuercies polítiques del Conceyu de Xixón en 2006”, dalgo qu’amás nun supón gastu nengún pa les arques municipales. “Los conceyales de tolos departamentos han saber qu’usar l’asturianu na publicidá d’actividaes, cartelería d’instalaciones, anuncios en prensa, xunto al castellanu si se quier, nun supón nengún gastu estra, yá que’l Conceyu de Xixón cunta con una Oficina de Normalización Llingüística na so estructura, polo que nun usalu ye namás frutu d’una intencionalidá y nunca pue echase la culpa a la falta de recursos. Ye por ello qu’Iniciativa pol Asturianu afala al Conceyu de Xixón a usar l’asturianu en toles actividaes, de forma tresversal, lo que supondría una importante promoción pa la llingua de los xixoneses y los asturianos, que tantes carencies sufre na so visibilización pública”, añade’l coleutivu cívicu.

Na semeya, un autobús municipal de la llinia 4 circula pela cai Institutu col topónimu castellanu 'Las Mestas' na pantalla indicativa.