Empieza en Deva'l VI 'Orgullín del Norte'

L'alcuentro LGTBI más importante d'Asturies principia esti xueves col izáu de la bandera arcu la vieya a cargu del artista Rodrigo Cuevas. El xixonés Camping de Deva va acoyer cuatro xornaes de folixa y de reivindicación.

A les 19 hores ta programáu l'actu inaugural del VI 'Orgullín del Norte', nel que va actuar Londra Show como madrina d'honor. Al izáu de la bandera ta prevista la presencia de representantes de la corporación municipal y otros grupos de movimientos sociales, asina como de XEGA como coleutivu LGTB+ d'Asturias colos que los responsables del 'Orgullín del Norte' "trabayamos en comuña na busca de la visibilidá, normalidad y igualdá". Yá pela nueche, a les 22 hores, los presentes van celebrar San Xuan con una foguera y l'espectáculu de fueu de Minerva Barragán.

El vienres será'l Día d'Asturies, con comida tradicional, gaites, concursu d'escanciáu y xuegos tradicionales. Pela nueche habrá una cena de parrillada y la 'Fiesta de la Pluma'. La Manifestación del Arguyu LGTBI peles cais de Xixón, "como un actu de visibilidá y dignificación de too un coleutivo qu'entovía sigue lluchando pola igualdá y la tolerancia", va protagonizar la xornada del sábadu, que va zarrase coles actuaciones nel Camping de Deva de Londra Show, DiCarlo y dellos pinchadiscos.

El Día de la Diversidá Familiar va poner el ramu al 'Orgullín del Norte' el domingu, convirtiéndose nel momento más especial al da-y el protagonismu a les families, sobre manera a los neños y neñas. La reciella contarán cola animación de Despreocúpate Eventos, hinchables y xuegos, mientres que los adultos tamién van poder disfrutar de la representación 'Orgullo y prejuicio astur', la música de Silvidos y Gemidos y una paella.