Emilio Pérez Touriño diz que l’idioma nun va ser un problema ente Asturies y Galicia

El cume ente los gobiernos d'Asturies y Galicia que se desarrolla dende ayeri en Compostela tuvo na cuestión identitaria y idiomática de les dos comunidaes ún de los sos puntos d'interés. El presidente gallegu declaró tres de la polémica poles presiones galleguistes nel occidente asturianu que "l'idioma nun va ser un problema ente Asturies y Galicia". El líder nacionalista y vicepresidente gallegu Anxo Quintana, pela so parte congracióse de que "los conceyos asturianos quieran selo" anque tamién declaró que diba recibir "colos brazos abiertos a quien quixere ser gallegu ensin anexonismos".


Anque l'asuntu de la llingua y el territoriu nun apaecía n'axenda oficial del alcuentru, los dirixentes gallegos ficieron delles declaraciones sobre ello. El dirixente nacionalista Anxo Quintana quixo quitá-y fierru a la polémica poles llendes con Asturies y declaró que la so propuesta pa qu'otros conceyos pudieren amestase a Galicia había vese como una muestra d'aperturismu pesllando la cuestión con un simil lliterariu sacáu del escritor Manolo Rivas en cuantes que "gallegu pue ser cualquiera". El presidente asturianu Álvarez Areces declaró sobre la cuestión cultural que se comprometía a potenciar los llazos culturales ente dambes comunidaes afirmando que "Los nuestros pueblos tan hermanaos dende va sieglos y nos en cuenta de poner estorbises a la so cultura lo que vamos facer ye desarrollala"


Otramiente Areces describió'l cume, el primeru en siete años y al que tan desplazaos siete conseyeros del Gobiernu asturianu y diez del gallegu como un intentu de facer "actividaes comunes pa defender los intereses de les dos comunidaes y construyir espacios más allá de los ámbitos territoriales con polítiques intelixentes y de futuru". La creación de l'autovía trescantábrica ente les dos comunidaes, un rexistru telemáticu común, alcuerdos en materia de formación pa funcionarios o'l diseñu de la tresferencia de los trenes de vía estrencha de FEVE son dellos de los puntos que se traten nel cume. La cooperación en temes agrarios y ganaderos, con un alcuerdu específicu pa los conceyos na llende ente les dos comunidaes, el futuru de la política pesquera y acciones comunes en tema cultural y de turismu tamién tan n'axenda