Emburrión del Congresu a les selecciones autonómiques

El Congresu Español aprebó ayeri de manera sorprendente una proposición qu'afala a la participación en competiciones internacionales de "toles selecciones autonómiques que lo demanden". Tolos partíos de la cámara, sacantes el PP, votaron a favor de la propuesta que presentó la diputada d'Eusko Alkartasuna Begoña Lasagabaster.

La propuesta d'EA nun especifica si se refier a competiciones oficiales o amistoses, pero según dan anuncia d'ello El Mundo, La Voz de Galicia y Vilaweb, el PSOE esclarió que que les selecciones autonómiques nun van poder participar naquelles competiciones en que tome parte la selección española .

Con ello la votación tien namás un calter simbólicu, porque de fechu tranca la puerte a qu'una selección autonómica pudiere presentase a les clasificatories pa un mundial o cualquier otra competición de primer nivel. Con too y con ello, ye sorprendente que'l PSOE votare al favor de la propuesta, en cuantes que'l partíu de Zapatero se declarare contrariu a les selecciones autonómiques dempués de dar de pasu la Federación Internacional d'Hockey reconociere a la selección catalana.

La propuesta inicial d'Eusko Alkartasuna namás reconocía l'el derechu de presentase a competiciones internacionales a Cataluña, Euskadi y Galicia, colo qu'Asturies nun podría atechase nesta moción, que tampoco nun tien calter de llei.

Ello foi que de mano nun hebo alcuerdu pa dala de pasu énte la rocea del PSOE, que nun taba d'alcuerdu con una moción que ponía a estes trés autonomíes al mesmu nivel qu'España, pero la práctica que ta faciendo l'actual presidente de la cámara Manuel Marín de dexar toles votaciones pa lo último de cada sesión dio un marxe estra de negociación nel que se llegó a una redacción definitiva que diz que "los poderes públicos promoverán la presencia de les selecciones deportives autonómiques que lo soliciten nes competiciones internacionales". Ello siempre ensin cruciar cola participación de la selección española, en cuantes que'l PSOE espresó que nun había voluntá de camudar el marcu llexislativu esistente en materia de deportes