¿Eleiciones en Navidá?

Mariano Rajoy va dir a la investidura'l día 30 y nel casu d'una tercera cita coles urnes, ésta se celebraría'l 25 d'avientu.

Tres una reunión d'una hora desendolcada ayeri ente'l presidente en funciones y el líder de Ciudadanos, Albert Rivera, la cuarta dende'l 26-X, Rajoy anunciaba que se presentaría a la investidura por tener agora la seguridá de que puede nun fracasar ésta. El PP, tres aceptar les demandes de la formación naranxa, incluyida la robla d'un Pautu Anticorrupción que tuvo llugar esta mañana, cuenta asina col sofitu de Ciudadanos y ta mui cerca de consiguir tamién el de Coalición Canaria-Partido Nacionalista Canario, anque entovía nun tien los votos suficientes pa conformar Gobiernu yá que necesitaría al menos once astenciones.

Ana Pastor, presidenta del Congreso, convocó l'aniciu del Plenu d'Investidura pal día 30, xornada na qu'habrá l'alderique. El 31 celebraríase la primer votación, na que ye necesaria la mayoría absoluta, mentes que la segunda, na que Ciudadanos comprometióse a sofitar a Rajoy, tendría qu'entamase nes 48 hores siguientes. Nesta última, el popular necesitaría una mayoría simple pa ser reelexíu na presidencia.

Nel casu de fracasu nesta primer investidura y de que nun plazu de dos meses nun s'escoyera presidente, habría que dir a eleiciones nueves, les terceres, que tendríen como fecha una xornada señalada, como ye'l Día de Navidá.