El saxofonista Eladio Díaz saca’l so primer discu al mercáu xunto cola banda Control Z

Eladio Díaz, saxofonista de Dixebra, ta acabante d’asoleyar el so primer trabayu en solitariu, pa lo que se fai acompañar de la so banda paralela, Control Z. Trátase d’una propuesta sonora “radical y orixinal” con bases de jazz y con temes en dellos idiomes, ente ellos l’asturianu.

Goxe Producciones, sellu dirixíu por Xune Elipe, espubliza esti discu nel que les composiciones de Díaz son trabayaes xunto colos conocíos músicos de jazz Marco Martínez (guitarra), Antony da Cruz (baxu) y Fernando Arias (batería), esto ye, xunto col raperu Grilo, Control Z, pa crear una propuesta nada convencional, con una estructura llibre nel qu’hai espaciu pal funk, el hip hop, la tonada o la esperimentación. “El resultáu ye una obra mui personal, ensin concesiones, de muncha calidá y qu’esixe a los oyentes tar predispuestos a sentir dalgo pa lo qu’ellos tamién tienen que poner de la so parte, nun exerciciu compartíu que busca’l feedback ente los dos actores”, espresen dende la discográfica.

El trabayu del que ye saxofonista de Dixebra dende hai más de 15 años inclúi les voces de los raperos Grilo, Daniel Pose (aka Dani Antistailo) o Shalom, con lletres “reflexives, íntimes y personales delles veces, pero non exentes de reivindicación”, tanto n’asturianu como en castellanu, francés, inglés o portugués. “El timbre distintu de caún de los cantantes y la so particular manera de rapear, amás de la variedá idiomática, da-y al discu una diversidá que ye d’agradecer, fuxendo del peligru de la monotonía na que en munches ocasiones cai’l hip hop más ortodoxu”, añaden.

'Coyí d'un artu una flor'

Ente les nueve composiciones del discu destaca enforma la pieza final, ‘Coyí d’un artu una flor’, “una especie de deconstrucción sonora d’esa perconocida tonada, nun exerciciu arriesgáu pero mui suxerente que nos muestra una visión nueva dafechu de la música vocal asturiana por excelencia”. A la vanguardista propuesta musical de Díaz y la calidá de los músicos de los que s’arrodia nesti trabayu, hai que sumar el cuidáu diseñu del discu obra de J. M. Navarro ‘Nava’ con foto de portada de José Manuel Calvo.