El XXXIV Festival de la Sidra de Nava protagoniza la fin de selmana

Con actividaes dende'l martes pasáu en Nava, el sábadu va celebrase la xornada principal del XXXIV Festival de la Sidra. L'aniciu de la Semana Negra, el Maizu Rock, el V Tolivia Fest y les fiestes de Sotrondio son dalgunos de los eventos previstos pa estos díes.

El festival sidreru de Nava, el más importante del país xunto col de Xixón, va celebrar esta tarde, a les 20 hores, una mesa-alderique nel salón d'actos del Muséu de la Sidra entitulada 'Reflexiones en torno al Museo de la Sidra. Realidades presentes, perspectivas de futuro', pa depués dar pasu a la folixa cola orquesta Waykas y col artista David Civera. Yá mañana, l'actividá va principiar a les 11.30 hores con una preba de sidra natural fecha nel conceyu y productos gastronómicos navetos a los que van siguir una gran cantidá d'actividaes cola bébora nacional y la música como protagonistes.

Esti certame atrae a miles de persones a Nava pa vivir la folixa, que fina'l llunes. Pa poder desplazase al conceyu, Renfe/Feve entama los populares 'Sidrotrenes' y, de nueche, la empresa ALSA tamién pon autocares qu'enllacen con delles poblaciones asturianes.

'Semana Negra'

La 'Semana Negra', l'eventu más multitudinariu del branu xixonés tamién da comienzu güei cola llegada del Tren Prietu. Per delantre queden diez díes de charres, alderiques, presentaciones, recitales y muncha folixa alredor de la lliteratura prieta nos vieyos terrenos de Naval Xixón, nel barriu d'El Natahoyo. L'apertura oficial va celebrase a les 17 hores y esti añu l'asturianu torna a tar presente en dalgunes de les actividaes programaes.

Asina, nes d'esta fin de selmana, el domingu, a les 20.30 hores, va presentase 'El viaxe a la lluz' (Suburbia Ediciones), de Ruma Barbero, na carpa 3, actu nel que va tar presente xunto al autor Boni Pérez. El dibuxante xixonés tamién firmará exemplares del llibru'l miércoles, a les 19 hores, na carpa de la llibrería La Buena Letra.

Maizu Rock

Trés de les bandes más reconocíes de la escena rock asturiana, Skontra, Desakato y Mala Reputación, van tocar esti sábadu nel festival Maizu Rock, que vive la so cuarta edición y que tien como sede Intriago. De carauter de baldre y cola opción d'acampar nesta población de Cangues d'Onís, completen el cartelu Deskarte, Gajes del Oficio y Diligence, amás de KFJack, que va protagonizar la sesión vermú.

V Tolivia Fest

El sábadu tamién Tolivia va contar con un eventu que va atrayer a cientes de persones al pueblu, nesti casu alredor de la cerveza artesano. Trátase del Tolivia Fest, que suma cinco ediciones, y que va contar coles actuaciones d'El Koku la Manzana y Dúo Fusión, pel día, y de SWAP, Los Incorregibles y l'ex Barón Rojo Sherpa, pela nueche.

Fiestes de Sotrondio

Sotrondio ye una de les munches poblaciones que tán en fiestes estos díes n'Asturies, nesti casu con motivu de Samartín de Tours. La Misión protagoniza la verbena d'esta nueche, mentes que Tabú y Distrito Xoven van tocar na de mañana, Waykas Family na del domingu y Europea Big Bang, na del llunes. Ente les munches actividaes previstes destaca'l concursu estatal de charangues, el desfile de coches y motos o la paella popular, siendo l'eventu más esperáu la 'jira' del llunes.