El XXIII Salón de Teatru Costumista Asturianu de Candás presenta cinco estrenos absolutos nel Teatru Prendes

La compañía teatral femenina Les Ayalgues de Carreño va abrir esti miércoles el XXIII Salón de Teatru Costumista de Candás con ‘De aquí y de allá’. En total van representase doce obres hasta'l domingu 1, de les que cinco son estrenos absolutos.

El Teatru Prendes va ser, como ye vezu, la sede de les actuaciones d’estes formaciones de teatru amateur que trabayen un xéneru que caltién tirón ente’l públicu, como amuesen los enllenos que vive la instalación candasina mientres tolos díes del salón o nes representaciones que se celebren n’otros puntos d’Asturies. Un exemplu más del ciñu que tien la xente hacia l’idioma del país, anque non toles formaciones cuiden la correición llingüística como se debería. Pa inaugurar esta edición del Salón de Teatru Costumista de Candás, la vixésimotercera, el grupu llocal Les Ayalgues de Carreño va estrenar la obra ‘De aquí de allá’, escrita por dellos autores. La cita ye mañana a les 23 hores, hora oficial de comienzo de toles representaciones d’esta iniciativa del Conceyu de Carreño.

Los otros estrenos previstos nesta edición, hasta sumar cinco, son ‘Aquellos maravillosos años’, de JR Oliva, a cargu de los xixoneses Rosario Trabanco (vienres); ‘¿Quién ye’l postreru’, de Segis Meana, a cargu de los uviedinos Chanclos Asgaya (martes); ‘L’apuesta los centollos’, de José Neira, a cargu de los llangreanos Kumen (sábadu 31); y ‘El chigre de Generosa’, d’Eloy Fernández Caravera, a cargu del grupu de Perlora Xana (domingu 1 de setiembre). El resto de funciones son les siguientes: ‘Después de vieyos, gaiteros’, por En Sin Reparu, de Sebares (xueves), ‘Contente Clemente’, por Santa Bárbara, de Llaranes (sábadu); ‘Contigo pan y cebolla’, por Traslluz, de Xixón (domingu); ‘Los chiflaos’, por Refaxu, de Samartín del Rei Aurelio (llunes); ‘Les ayalgues de la marquesa’, polos sierenses de Carbayín (miércoles 28); ‘El trampas del vecín’, por El Horreo, de Barcia (xueves 29); y ‘Desatraca y la Madalena y San Roque’ y ‘Los forofos’, de la Compañía Asturiana de Comedias, de Xixón (vienres 30). Los precios son de 4 euros para los socios y de 6 euros, pa los non socios. Les entraes van ponese a la venta na puerta una hora enantes del principio de les funciones, esto ye, a les 22 hores.

Premios Aurora

La gran folixa del teatru costumista asturianu de Candás va completase’l vienres 6 de setiembre, a les 20 hores, cola celebración de la gala de los Premios Aurora, nos que collabora FETEAS. Esti eventu, enllenu d’humor, inclúi un espectáculu sobre’l que xira tola ceremonia, qu’esti añu lleva’l nome de ‘La gala puede esperar’, creada por Alain Fernández. Les nueve categoríes que se premien son ‘Meyor Actor’, ‘Meyor Actor Secundariu’, ‘Meyor Actriz’, ‘Meyor Actriz Secundaria’, ‘Meyor Direición’, ‘Meyor Maquillaxe-Vestuariu’, ‘Meyor Decoráu/Illuminación’, ‘Meyor Compañía Profesional’ y ‘Meyor Testu Teatral’, gallardones a los que suma un ‘Premiu Honoríficu”.

Otra manera, de forma paralela al XXIII Salón de Teatru Costumista de Candás, va impartise’l IX Taller de Monologuismu Cómicu Asturianu, col oxetivu d’introducir nesti xéneru a toles persones interesaes. Amás, ta prevista la entrega del Premiu Ánxelu a una persona que destaque pola divulgación del monologuismu asturianu.