El XXIII Conciertu pola Oficialidá protagoniza l’actividá musical d’esta fin de selmana

La Feria de Muestres de Xixón va vivir esti sábadu más d’ocho hores de música cola llingua asturiana como protagonista. El Conciertu pola Oficialidá repite na ciudá pa reivindicar los derechos llingüísticos de los asturianos.
 
Blima, Toli Morilla, Llangres, La Bandina, Misiva, K-Nalón, La Tarrancha y La Coḷḷa Propinde son les ocho bandes que van participar nel XXIII Conciertu pola Oficialidá a partir de les 19 hores. Hai que destacar qu’esta iniciativa entamada pola Xunta pola Defensa de la Llingua Asturiana y Xunta Moza cuenta cola participación solidaria de tolos grupos, que nun cobren por actuar.
 
El preciu pa presenciar el conciertu ye de 8 euros, anticipada, y de 10, na puerta. Ésti va carauterizase pola calidá de toles bandes participantes y pola mestura d’estilos, que van dende’l folk más tradicional al punk-rock o’l hip-hop. Otra manera, mañana tamién va dase a conocer al públicu’l cantar qu’ellaboró esti añu Músicos pola Oficialidá y que, per primer vegada, nun va asoleyase en soporte físicu. Pronto va tar colgáu na web de la Xunta pola Defensa de la Llingua Asturiana.
 
Ente les actuaciones previstes pa esta fin de selmana tamién destaca’l musical Forever King of Pop, dedicáu a Michael Jackson, que dende ayeri y hasta’l domingu se representa nel Teatru de la Llaboral de Xixón. Amás, esti vienres va actuar el grupu tributu a Tool, Lateralu (19.30 hores, Centru Municipal d’Arte y Esposiciones d’Avilés ‘L’Arbolón’); ‘Mu. Dances y Instrumentos del mundo’ (20 hores, Centru Cultural Caxastur Jerónimo Ibrán de Mieres); y Pignoise (22 hores, Atlántida de Lluanco). Yá de sábadu, sobresal el conciertu de Nacho Vegas (20.30 hores, Teatru Xovellanos), nel que’l xixonés va presentar el discu ‘La zona sucia’; y, el domingu, una xornada nueva de la fase final de ‘Concursu de Folclor Ciudá d’Uviéu (11.45 hores, Teatru Filarmónica).