El XXI Salón de Teatru Costumista de Candás presenta siete estrenos

Candás vive dende esti miércoles la so cita añal col teatru costumista asturianu. Doce obres de teatru van representase nel Prendes hasta’l 28 d’agostu, de les que siete son estrenos absolutos. La gala de los 'Aurora' va ser el 2 de setiembre.
 
Los actores y actrices de Santa Bárbara Teatru, de Llaranes, van ser los encargaos d’abrir el XXI Salón de Teatru Costumista Asturianu de Candás, a partir de les 23 hores, cola obra ‘Xente de la mar’, de Carmen Campo Mier. Per delantre, queden otres once xornaes de teatru nel que les compañíes principales qu’apuesten por esi xéneru van xubise a les tables del Teatru Prendes pa representar les sos meyores obres y dellos estrenos.
 
Asina, tres la representación de güei de Santa Bárbara Teatru, va llegar el turnu, siempre a les 23 hores, de Penedo Abayón (‘De piescos y escayos’), la Compañía Asturiana de Comedias (‘El maestro Tarabica’, estrenu), Refaxu (‘Clandestines’, estrenu) y Rosario Trabanco (‘Barajolles col difuntu’, estrenu). Mentes, a partir del llunes, los grupos de teatru protagonistes van ser Chancios Asgaya (‘Sin perres no hay casoriu’), La Cruz de Ciares (‘La Marisquera’, estrenu), El Hórreo de Barcia (‘Vamos pal baille’), Padre Coll (‘Lloca’, estrenu), Carbayín (‘Alta suciedad’), Traslluz (‘¡Qué vienen los otros!’, estrenu) y Grupu Cultural Xana (‘Antón, el quexón’, estrenu).
 
Completa l’actividá del Salón de Teatru Costumista de Candás la gala d’entrega de los premios 'Aurora', el vienres 2 de setiembre, a les 20 hores. Nella, va recibir el ‘Aurora Sánchez’ honoríficu de testos teatrales l’escritor y direutor teatral Segismundo Meana Pérez pola so obra ‘Drácula ye teberganu’, mentes que los nominaos n’otres categoríes van dase a conocer los díes previos a la gala. La gala, que va tener munches sorpreses, va xirar alredor d’un espectáculu entituláu ‘En busca del premiu perdíu’ que toma como referencia la historia d’Indiana Jones onde l’aventureru ta a la gueta del Arca de l’Allianza que guarda les tables colos diez mandamientos.